2014 წელს მეცნიერებმა გამოაქვეყნეს კვლევა, რომელშიც ნათქვამი იყო, რომ სხვადასხვა დაწესებულებაში არსებულ ტუალეტებში დაყენებული ხელის უკონტაქტო საშრობები ბაქტერიების უდიდესი წყაროა.

ცნობილია, რომ ადამიანების უმეტესობა ხელს არასწორად იბანს, საშრობი მოწყობილობები კი ჩვენს ხელებზე დარჩენილ ბაქტერიებს მთელ ოთახში აფრქვევენ, შესაბამისად, ხელის გაშრობის შემდეგ ტუალეტიდან გამოსვლისას თქვენი სხეული ბაქტერიებითაა სავსე.

ლაბორატორიაში ჩატარებულ ექსპერიმენტში დადგინდა, რომ ჰაერის საშრობები ქაღალდის ხელსახოცებთან შედარებით ოთახში ბაქტერიების რაოდენობას 27-ჯერ ზრდის.

ახლახან მეცნიერებმა აღნიშნულ საკითხზე ახალი კვლევა ჩაატარეს. მათ სურდათ დაედგინათ, ზუსტად რა კავშირი იყო ხელის გამშრალების მეთოდებსა და ტუალეტში ბაქტერიების რაოდენობას შორის. აღნიშნული ექსპერიმენტი პარიზში, ლიდზში და უდინეში არსებულ საავადმყოფოებში ჩატარდა. საავადმყოფოები ანტიბიოტიკებისადმი რეზისტენტული ბაქტერიების მნიშვნელოვანი წყაროა.

ჰაერის საშრობები ქაღალდის ხელსახოცებთან შედარებით ოთახში ბევრად მეტ ბაქტერიას ავრცელებს

ჰაერის საშრობები ქაღალდის ხელსახოცებთან შედარებით ოთახში ბევრად მეტ ბაქტერიას ავრცელებს

ფოტო: University of Leeds

სამივე საავადმყოფოში მეცნიერებმა მსგავსი შედეგი მიიღეს, ისინი ბაქტერიების რაოდენობას ხელის საშრობისა და ხელსახოცების დისპენსერის ზედაპირზე ზომავდნენ. ხელის საშრობზე არსებული ბაქტერიების რაოდენობა, ხელსახოცების დისპენსერზე არსებულს, უდინეში 100-ჯერ, პარიზში 33-ჯერ და ლიდზში 22-ჯერ აღემატებოდა.

დიდ ბრიტანეთში არსებულ ტუალეტებში ჰაერის საშრობების გამოყენებისას ანტიბიოტიკებისადმი რეზისტენტული სტაფილოკოკის რაოდენობა სამჯერ გაიზარდა.

"ჩვენ ვფიქრობთ, რომ საავადმყოფოებში ხელის საშრობების გამოყენება გაუმართლებელია და საჭიროა, რომ აღნიშნული საკითხი უფრო მკაცრად დარეგულირდეს", - აცხადებენ მეცნიერები.

"ადამიანები ხელებს სათანადოდ არ იბანენ, შემდეგ კი ჰაერის საშრობი მათ ხელზე არსებულ ბაქტერიებს მთელ ოთახში ფანტავს. ქაღალდის ხელსახოცი კი ხელზე არსებულ წყალსა და მიკრობებს იწოვს და ოთახს ბაქტერიებით არ აბინძურებს" - აცხადებს კვლევის ავტორი.