საქართველოს პარლამენტის ჯანდაცვის კომიტეტის თავმჯდომარის აკაკი ზოიძის განცხადებით, იმ შემთხვევაში თუ ხელისუფლება ვერ აუხსნის საზოგადოებას, რას ნიშნავს რეალურად კანაფის კონტროლის შესახებ კანონი, კანონპროექტის განხილვა არ გაგრძელდება. ამის შესახებ აკაკი ზოიძემ ტოკ-შოუ რეაქციაში განაცხადა.

მან გადაცემაში მყოფ სასულიერო პირების განცხადებებსაც უპასუხა, რომლებმაც აკაკი ზოიძეს კანაფის კანონპროექტის ლობისტი უწოდეს.

"შემწყნარებლობა საჭიროა ერთმანეთის მიმართ. უხერხულია მე რომ ვამბობ ამ სიტყვებს, როცა თქვენთან სასულიერო პირები იყვნენ სტუმრად და მათ არ უთქვამთ ეს სიტყვები, ასევე უხერხულია იარლიყების მოკერება, როგორიცაა მოღალატე, რაც შთამომავლობაზე გადავა", - განაცხადა აკაკი ზოიძემ.

მისი თქმით, საქართველოში არ უნდა იყოს ტაბუდადებული თემები. "წინააღმდეგ შემთხვევაში აღმოვჩნდებით იმავე უფსკრულში, რომელიც 90-იან წლებში ვიყავით", - ამბობს დეპუტატი.

აკაკი ზოიძის თქმით, ეკლესია გამოხატავს ჩვენი საზოგადოების მრწამსს, მიზნებს და ხშირ შემთხვევაში ზემოქმედებს განწყობებზე

"ჩვენ თუ საზოგადოებას დავუპირისპირდით ეს ხელისუფლება ხელისუფლება აღარ იქნება. სხვის სიკვდილზე, ცრემლებზე, უბედურებაზე გაკეთებული ფული არც ბიუჯეტს გამოადგება და არც ხალხს, ეს არის ცოდვა, მორალი და ყველანაირი კრიტერიუმით მიუღებელი", - განმარტა დეპუტატმა.

აკაკი ზოიძე განმარტავს, რომ მნიშვნელოვანია საზოგადოებას აუხსნან, რომ ზიანი, რაც კანაფს მოაქვს ხელისუფლებას სურს სარგებლად გადააქციოს.

"მას შემდეგ, რაც კითხვებსა და რისკებს ამოვწურავთ, მაშინ შეიძლება გაგრძელდეს კანონპროექტის განხილვა. დეკრიმინალიზაციის კანონი იმიტომ ვერ მივიღეთ, რომ ფული არ არის სერვისებისთვის და კანაფის ექსპორტი ამის კარგი რესურსია", - ამბობს აკაკი ზოიძე.

მისი თქმით, 4 დღეა საზოგადოებას კანონპროექტის აზრს უხსნიან და თუ ეს მესიჯი ვერ მიდის მოსახლეობასთან, კანონი უდღეურია.

"ეკლესიას და ჩვენ შეგვიძლია საზოგადოების აზრი გავზომოთ. თუ დავინახეთ, რომ საზოგადოებრივი აზრი არ არის წინააღმდეგი სამედიცინო მიზნით ექსპორტზე, მაშინ შეიძლება გავაგრძელოთ პლენარული და საკომიტეტო საკითხები, თუ ვერ შევძელით ეს დამთავრდება", - განაცხადა აკაკი ზოიძემ.

დეკანოზი, შალვა კეკელია აცხადებს, რომ საპატრიარქო კანაფის კონტროლის შესახებ კანონპროექტის განხილვაში მონაწილეობას არ მიიღებს. მისი თქმით, ეკლესია ერთსულოვანია გადაწყვეტილებაში და მმართველ გუნდს მოლაპარაკე არ გამოუვა.

საქართველოს საპატრიარქომ განცხადება გაავრცელა, სადაც აღნიშნა, რომ სრულიად მართმადიდებელი ეკლესია და მრევლი ეწინააღმდეგება ნებისმიერი მიზნისთვის მარიხუანის რეალიზაციის ლეგალიზებას.

საქართველოს პარლამენტმა კანაფის კონტროლის შესახებ კანონის პროექტის განხილვა გადაავადა. გადაწყვეტილება დეპუტატებმა 17 სექტემბრის ბიუროს სხდომაზე მიიღეს. გადავადება ნიშნავს, რომ კანონპროექტის საკომიტეტოს განხილვა პარლამენტში ჯერ არ დაიწყება. უცნობია გადავადების ზუსტი დროც.

კანონპროექტის გადავადების გადაწყვეტილება უმრავლესობამ მას შემდეგ მიიღო, რაც აღნიშნულ ინიციატივას საქართველოს მართლმადიდებელი ეკლესია დაუპირისპირდა.