ევროპის ფონდმა საზოგადოებას სურსათის უვნებლობის სახელმწიფო რეგულირების შეფასება წარუდგინა. ანგარიშში შეფასებულია სანიტარული და ფიტოსანიტარული სფეროს რეგულირების მიზნით, ხელისუფლების მიერ 2017 წელს გაწეული საქმიანობა. ასევე გამოკვლეულია ასოცირების შეთანხმებით აღებული ვალდებულებების შესრულების ხარისხი.

ანგარიშის ავტორთა თქმით, არსებობს რამდენიმე სფერო, რომლებზეც მეტი ყურადღების გამახვილებაა საჭირო, მათ შორის:

  • სურსათის უვნებლობის რეგულირებისათვის საჭირო ნორმატიული აქტების დიდი ნაწილი მტკიცდება ისე, რომ არც საჯარო და არც კერძო სექტორზე მათი სავარაუდო ფინანსური ზეგავლენა არ არის დათვლილი;
  • ნორმატიული აქტების ძალაში შესასვლელად დაწესებულია გრძელვადიანი გარდამავალი პერიოდები;
  • საკანონმდებლო დაახლოების პროცესი არასაკმარისად გამჭვირვალე და თანამონაწილეობითია;
  • სახელმწიფო კონტროლის შედეგების სრული გამჭვირვალობა ხშირად ფერხდება;
  • მცენარეული პროდუქტის მიკვლევადობა პრაქტიკულად არ არსებობს;
  • სასმელი წყლის ნიმუშებში აღმოჩენილი შეუსაბამობის ზღვარი მაღალია;

კვლევის შედეგებმა ასევე აჩვენა, რომ სურსათის ბიზნესოპერატორებს ძირითადად აქვთ პოზიტიური დამოკიდებულება სურსათის უვნებლობის სისტემის მიმართ.

ამავე კვლევაში ნათქვამია, რომ ჯერ კიდევ არის მნიშვნელოვანი გამოწვევები ცხოველის დაკვლის პროცესთან დაკავშირებით, განსაკუთრებით გახშირდა, საქონლის ხორცის გაყიდვების პრაქტიკა, ფორმა 2-ის (რომელიც აჩვენებს ხორცის პროდუქტის წარმომავლობას, სურსათის ეროვნული სააგენტოს მიერ კონტროლირებადი ობიექტიდან) გარეშე. აგრეთვე, არსებობს მაღალი რისკები, გადამამუშავებელი ქარხნების მიერ დაწუნებული რძის, არარეგისტრირებული სურსათის ბიზნესს ოპერატორებზე მიყიდვის პრაქტიკასთან დაკავშირებით, ყოველგვარი ხარისხის ან უვნებლობის კონტროლის გარეშე.

კვლევის მიხედვით, 2017 წელს, სურსათის ეროვნულმა სააგენტომ აიღო, სასმელი წყლის 548 ნიმუში. შეუსაბამობა აღმოჩნდა 42,3%-ში, რაც მხოლოდ ოდნავ უკეთესია, ვიდრე 2016 წლის 47%-იანი შეუსაბამისობა.

"ისევე როგორც 2016 წელს, უარყოფითი შედეგების 90% გამოწვეულია, მიკრობიოლოგიური დაბინძურებით, დიდი ქალაქების ფარგლებს გარეთ, რაც გვიჩვენებს, რომ სოფლად წყალმომარაგება კვლავ სავალალო მდგომარეობაშია და ადგილი არ აქვს მნიშვნელოვან გაუმჯობესებას 2016 წელთან შედარებით", - ვკითხულობთ კვლევაში.

ევროპის ფონდის პრეზიდენტი, ქეთევან ვაშაკიძე ამბობს, რომ სურსათის უვნებლობის სისტემის შესაქმნელად წლების წინ დაწყებული ადვოკატირების შედეგად მნიშვნელოვანი პროგრესი მიღწეულია, თუმცა კვლავ რჩება პრობლემები, რის გამოც პროცესზე დაკვირვება გრძელდება.

"მნიშვნელოვან გამოწვევად რჩება წყლის ხარისხი, სურსათის უვნებლობის სისტემაში კოორდინაციისა და კომუნიკაციის გაუმჯობესება, საზოგადოების ინფორმირებულობა და სისტემის გამჭვირვალობა,“- განაცხადა ევროპის ფონდის პრეზიდენტმა, ქეთევან ვაშაკიძემ.