აუდიტორია 115 განათლების მინისტრის ალექსანდრე ჯეჯელავას მიერ ჟურნალ ლიბერალთან მიცემულ ინტერვიუს ეხმაურება. მინისტრი აცხადებს, რომ სტუდენტებმა მოლაპარაკების ბოლო ეტაპზე მოთხოვნები შეცვალეს, რის გამოც დიალოგი ჩაიშალა.

"ბატონი მინისტრი იტყუება და ცდილობს საზოგადოების შეცდომაში შეყვანას", - წერს სტუდენტური გაერთიანება:

"უმაღლესი განათლების შესახებ კანონში 45-ე მუხლი არეგულირებს სტუდენტური თვითმმართველობის საქმიანობას. აუდიტორია 115-სა და სახელმწიფოს შორის შეთანხმების თანახმად, ეს მუხლი უნდა გადასულიყო გარდამავალ დებულებებში, რაც ახალი კანონის მიღებამდე შეაჩერებდა სტუდენტური თვითმმართველობების საქმიანობას".

მათი განცხადებით, ბოლოს წინა შეხვედრაზე, მინისტრმა განაცხადა, რომ ზემოთ აღნიშნული მუხლი გადავიდოდა გარდამავალ დებულებებში იმ პირობით, თუ სტუდენტები დათანხმდებოდნენ იმაზე, რომ კანონის მიღებამდე, სტუდენტურ თვითმმართველობას კვლავ ექნებოდა ექსკლუზიური წვდომა ფინანსებთან:

"პირობა ჩვენთვის მიუღებელი აღმოჩნდა, რადგანაც მინისტრმა იმისი ლეგიტიმაცია მოგვთხოვა, რის წინააღმდეგაც დავიწყეთ ბრძოლა. ჩვენი პოზიცია იყო, რომ მას შემდეგ, რაც 45-ე მუხლი გადავიდოდა გარდამავალ დებულებებში, სტუდენტური ცხოვრება თავისთავად დაექვემდებარებოდა 43-ე მუხლს, რომლის მიხედვითაც, სტუდენტებს თანაბარი წვდომა ექნებოდათ მატერიალურ რესურსებთან და ექნებოდათ თანაბარი შესაძლებლობა, სტუდენტური გაერთიანების შექმნის".

სტუდენტების განცხადებით, პირობა შეცვალა არა აუდიტორია 115-მა, არამედ განათლებისა და მეცნიერების სამინისტრომ. მათი თქმით უწყებამ მათ ლეგიტიმაციის მინიჭება მოსთხოვა სტუდენტური თვითმმართველობის საქმიანობისთვის:

"საქართველოს პრემიერ-მინისტრის, ბატონი გიორგი კვირიკაშვილის საჯარო განცხადება, სადაც ის ამბობს, რომ თავად უხელმძღვანელებს განათლების ფუნდამენტურ რეფორმასა და სხვა საკითხებზე მომუშავე პლატფორმას, ამის ნაცვლად კი პლატფორმის ხელმძღვანელი აღმოჩნდა ბატონი გია შარვაშიძე, რომელიც, როგორც ცნობილი გახდა, შესაძლოა ჩაერთოს თბილისის სახელმწიფო უნივერსიტეტის რექტორობისთვის ბრძოლაში. ვფიქრობთ, საზოგადოებისთვის ნათელია, რომ ამ პლატფორმის მიზანი არის არა განათლების რეფორმაზე მუშაობა, არამედ ბატონი გიასთვის ლეგიტიმაციის მინიჭება".

სტუდენტების განცხადებით, მათ სამინისტროს ულტიმატუმის საფუძველზე დატოვეს სამუშაო ჯგუფი:

"აუცილებლად უნდა დავთანხმებოდით სტუდენტური თვითმმართველობისთვის ექსკლუზიური უფლებების შენარჩუნებას, ბუნებრივია, ჩვენ ჩვენი თავი ვერ დავინახეთ ამ სამუშაო ჯგუფში, რის შემდეგაც შეხვედრა დატოვა აუდიტორია 115-ის ყველა წარმომადგენელმა".

სტუდენტები ეხმაურებიან მინისტრის კომენტარს აუდიტორია 115-ის შესაძლო პოლიტიკურ აპელირებაზე:

"ბატონი მინისტრი უღირსი მეთოდებით ცდილობს სტუდენტური მოძრაობის მარგინალიზებას. საბედნიეროდ, ბატონო მინისტრო, ჩვენ საზოგადოების დიდი ნაწილი გვიცნობს. მაშინ როდესაც თქვენ ტრენინგებს კითხულობდით კერძო ბანკებში, ჩვენ ვიბრძოდით უკეთესი უმაღლესი განათლებისთვის, ვიბრძოდით სამართლიანი სოციალური გარემოსთვის, 2012 წელს ვიბრძოდით ადამიანების წამების წინააღმდეგ და ა.შ. შესაბამისად, უნაყოფოა თქვენი მცდელობა, რომ მოახდინოთ ჩვენი მარგინალიზება".

განცხადების ბოლოს, აუდიტორია 115-ის წევრები მინისტრს მიმართავენ რომ მომავალში ისინი მასთან თანამშრომლობას აღარ აპირებენ:

"რაც შეეხება თქვენი ინტერვიუს ბოლო ნაწილს, სადაც ამბობთ, რომ ისევ მზად ხართ თანამშრომლობისთვის, როგორც არაერთხელ თავად აღგინიშნავთ, თქვენ ვერაფერს ვერ წყვეტთ, შესაბამისად, ჩვენ არ ვაპირებთ იმ ადამიანთან ურთიერთობას, რომელსაც არ შეუძლია პოლიტიკური გადაწყვეტილებების მიღება".