ოცნების პრემიერი ირაკლი კობახიძე უნგრეთში იმყოფება, სადაც საქართველო-უნგრეთის მთავრობათაშორისი სამიტი იმართება. კობახიძემ გუშინ უნგრეთის პრემიერმინისტრთან ვიქტორ ორბანთან ერთად გამართულ პრესკონფერენციაზე განაცხადა, რომ უნგრეთი საქართველოს ევროინტეგრაციის ყველაზე ძლიერ მხარდამჭერად რჩება.

"პირველ რიგში, მინდა ძალიან დიდი მადლობა გადაგიხადოთ უნგრეთში თქვენი გულთბილი მასპინძლობისთვის და კიდევ უფრო დიდი მადლობა მინდა გადაგიხადოთ იმ ძლიერი და ურყევი მხარდაჭერისთვის, რომელსაც ჩვენ ვგრძნობთ თქვენგან, ამას ძალიან აფასებს ქართველი ხალხი.

უნგრეთი არის და რჩება ჩვენი სუვერენიტეტის და ტერიტორიული მთლიანობის ძალიან ძლიერ მხარდამჭერად. ჩვენთვის ასევე არანაკლებ მნიშვნელოვანია ის მხარდაჭერა, რომელსაც ჩვენ ვიღებთ უნგრეთისგან, პირადად თქვენგან ბატონო პრემიერ-მინისტრო და უნგრეთის ხელისუფლებისგან საქართველოს ევროინტეგრაციის გზაზე.

უნგრეთი რჩება საქართველოს ევროპული ინტეგრაციის ყველაზე ძლიერ მხარდამჭერად. იმ პირობებში, როდესაც საქართველოს ექმნებოდა ხელოვნური დაბრკოლებები ევროინტეგრაციის გზაზე, უნგრეთი იყო სწორედ ის ქვეყანა, რომელიც მაქსიმუმს აკეთებდა საქართველოს ევროინტეგრაციისთვის, ამ პროცესის მხარდასაჭერად. ამისთვის თქვენ, ბატონო პრემიერ-მინისტრო და თქვენს მთავრობას მინდა განსაკუთრებული მადლობა გადაგიხადოთ," — თქვა კობახიძემ.

ცნობისთვის, ოცნების პრემიერი საპარლამენტო არჩევნების შემდეგ ორბანს მეშვიდედ ხვდება.

წინა შეხვედრების ქრონოლოგია ასეთია:

2024 წლის 29 ოქტომბერს თბილისში;
2024 წლის 7 ნოემბერს ბუდაპეშტში;
2025 წლის 13 თებერვალს დუბაიში;
2025 წლის 12 აპრილს ანტალიაში;
2025 წლის 16 მაისს ტირანაში;
2025 წლის 28 მაისს ბუდაპეშტში.