ხორავას ქუჩის საქმეზე შექმნილ საგამოძიაბო კომისიაში ქართულმა ოცნებამ დასკვნის თავისი ვერსია წარმადგინა, სადაც ნათქვამია, რომ პოლიტიკური მოტივით ან რომელიმე უწყების მხრიდან მართლმსაჯულებას ხელი არ შეშლია. განსხვავებული შეფასებებით დასკვნა უკვე გამოაქვეყნა საპარლამენტო უმცირესობამ, ევროპულმა საქართველომ. ხელისუფლება ოპოზიციის დასკვნას, რომელშიც საგამოძიებო უწყებების ტენდენციურობაზეა საუბარი, "პოლიტიკურად მიკერძოებულს" უწოდებს.

ქართული ოცნება თავის 20-გვერდიან დასკვნაში საგამოძიებო მოქმედებებთან დაკავშირებით იყენებს ტერმინებს "არ ჩატარდა, ან დაგვიანებით ჩატარდა", თუმცა ყველა შემთხვევაში განმარტავს, რომ ამას საქმის საბოლოო შედეგზე გავლენა არ ჰქონია. აქვე, პარტია გამოვლენილი ხარვეზების აღმოფხვრის მიზნით, საგამოძიებო და საგანმანათლებლო სფეროში ცვლილებების საჭიროებაზე მიუთითებს.

ქართული ოცნების "გაქარწყლებული ეჭვები"

საგამოძიებო კომისიამ საქმეში არსებული მასალების და გამოკითხულ პირთა ახსნა-განმარტებების ანალიზის საფუძველზე, ოცნებამ მიიჩნია, რომ:

1. ფარდული საგამოძიებო უწყებებისგან დამოუკიდებლად, მოქალაქეების ინიციატივით დაანგრიეს და მას შემდეგ, რაც ყველა აუცილებელი საგამოძიებო მოქმედება ჩატარდა;
2. ნივთმტკიცების სახით საქმეში არსებული დანა არ არის განზრახ დაზიანებული ("გაღუნული"). ექსპერტიზის ჩატარებისას დანამ მიიღო მიკროდეფორმაცია, რაც არ ჩანს შეუიარაღებელი თვალით. დანა ვარგისია შემდგომი საექსპერტო კვლევისთვის;
3. მირზა სუბელიანის "ხელშეუხებლობა" და მის მიერ გამოძიების მიმდინარეობაზე შესაძლო ზეგავლენის მოხდენის ეჭვი არ დადასტურდა.

ქართული ოცნების მიერ მიჩნეული დადგენილი გარემოებები

• მკვლელობის ძირითადი საქმის გამოძიების ფარგლებში არ ჩატარებულა გარკვეული საგამოძიებო მოქმედებები;
• გამოძიებას არ შეუფასებია დანაშაულთან ცალკეული პირების ამა თუ იმ ფორმით შესაძლო კავშირი;
• მირზა სუბელიანის, მისი შვილისა და ცოლის დისა და მისი შვილის მიმართ არ ჩატარდა ცალკეული საგამოძიებო მოქმედებები. მათ შორის, არ გაიცხრიკა მიხეილ კალანდიას სახლი;
• გარე სათვალთვალო კამერების ჩანაწერების ნაწილი არ არის, ან დაგვიანებით არის ამოღებული. ასევე, არ დადგინდა ჩანაწერებში აღბეჭდილი ყველა პირის ვინაობა;
• არ ამოღებულა ჩხუბის გარკვეულ მონაწილეთა მობილური ტელეფონები და კომპიუტერები, აგრეთვე მათი მიმოწერა. არ განხორციელდა მათი სატელეფონო საუბრების ფარული მიყურადება და ჩაწერა;
• საქმესთან დაკავშირებით შესაძლო ინფორმაციის მქონე ზოგიერთი პირი არ დაიკითხა ან დაიკითხა დაგვიანებით;
• არ გაიჩხრიკა საქმესთან შემხებლობაში მყოფი ზოგიერთი პირის ბინა და არ იქნა ამოღებული მათი ტანსაცმელი;
• დ. ღ.-ს მიმართ არ ჩატარდა ცალკეული საგამოძიებო მოქმედებები.

კომისიის ქართული ოცნების წევრების შეფასება

მიუხედავად ამისა, ქართული ოცნება მიიჩნევს, რომ ცალკეული საგამოძიებო მოქმედებების ჩაუტარებლობა ან დაგვიანებით ჩატარება არ შეიძლება, ერთმნიშვნელოვნად შეფასდეს რომელიმე თანამდებობის პირის მხრიდან სამოხელეო დანაშაულის ჩადენად.

კომისიის წევრები ქართული ოცნებიდან ამას იმით ხსნიან, რომ ყოველ სისხლის სამართლის საქმეს ინდივიდუალურ მიდგომას სჭირდება.

კომისიის ქართული ოცნების წევრებმა დაადგინეს, რომ საგამოძიებო მოქმედებების ჩაუტარებლობამ/დაგვიანებით ჩატარებამ არსებითი გავლენა ვერ მოახდინა გამოძიების საბოლოო შედეგზე და მართლმსაჯულების განხორციელებაზე.

ამავე დოკუმენტით დადგინდა, რომ საგამოძიებო მოქმედების ჩაუტარებლობა/დაგვიანებით ჩატარება არ არის ვინმეს მხრიდან სამოხელეო დანაშაულის ჩადენის ან განზრახი ქმედების შედეგი.

ქართული ოცნება მიიჩნევს, რომ დასკვნის გაკეთება, თითქოს გამოძიებაზე ვინმემ გავლენა მოახდინა, სამომავლოდ საფრთხეს შეუქმნის არა მხოლოდ საგამოძიებო კომისიის რეპუტაციას, არამედ, ზოგადად, საგამოძიებო სისტემას. მათივე დოკუმენტში ნათქვამია, რომ ვერ დგინდება გამოძიებაზე პასუხისმგებელი კონკრეტული სუბიექტი:

"კომისია ვერ გააკეთებს დასკვნებს შესაძლო ეჭვებზე დაყრდნობით, უტყუარი მტკიცებულებების გარეშე".

მმართველი პარტიის წარმომადგენლების მიერ მომზადებულ დოკუმენტში ნათქვამია ისიც, რომ ცალკეული საგამოძიებო მოქმედებების ჩაუტარებლობა/დაგვიანებით ჩატარება, მცირე საგამოძიებო ვადის და არსებული ხარვეზიანი საგამოძიებო სისტემის შედეგია.