საზოგადოებრივი მაუწყებლის შესასვლელთან მიმდინარე აქციის პარალელურად მაუწყებლის მენეჯმენტი თანამშრომლებისთვის ხელშეკრულების ცვლილების შეთავაზებასა და ნაწილის გათავისუფლებას ახალი სამაუწყებლო სეზონის ეფექტიანად განხორციელებით ხსნის.

მაუწყებელი დაეთანხმა სახელმწიფო აუდიტის სამსახურის 2015-2016 წლის დასკვნას, რომლის მიხედვითაც, საზოგადოებრივ მაუწყებელში აღრიცხვიანობის სისტემა იყო მოშლილი და ფაქტობრივად, აღრიცხვა არ ხორციელდებოდა. არხის მენეჯმენტის ინფორმაციით, 2018 წლის მაისში დასრულდა შენობაში დაშვება-კონტროლის სისტემის მოწყობილობების მონტაჟისა და გამართვის სამუშაოები, რის შესახებაც საზოგადოებრივი მაუწყებლის თანამშრომლები არაერთხელ იყვნენ გაფრთხილებული.

"სრული პასუხისმგებლობით ვაცხადებთ, რომ ორგანიზაციიდან არავინ გაუთავისუფლებიათ, გარდა იმ რამდენიმე ადამიანისა, რომლებიც სამსახურში ფაქტობრივად არ დადიოდა, დანარჩენებს კი მაუწყებელმა შესთავაზა შრომითი ხელშეკრულების ცვლილება", - აღნიშნულია საზოგადოებრივი მაუწყებლის მიერ გავრცელებულ განცხადებაში, სადაც ასევე ვკითხულობთ, რომ სულ 70-მდე თანამშრომელს შესთავაზეს შეცვლილი პირობებით მუშაობა.

რა იციან არხის თანამშრომლებმა

საზოგადოებრივი მაუწყებლის პროფკავშირების თქმით, არხის მენეჯმენტმა 150-მდე თანამშრომელს ხელშეკრულების ახალი პირობები და საათობრივ ანაზღაურებაზე გადასვლა შესთავაზა. ცვლილება ტექნიკურ პერსონალს შეეხო. ხელშეკრულების შესასწავლად და ხელმოსაწერად ზოგიერთ თანამშრომელს ვადა 4 სექტემბერს ეწურებათ, თუ ისინი პირობებს არ დასთანხმდებიან სამსახურს დატოვებენ.

საზოგადოებრივი მაუწყებლის თანამშრომლები აქციაზე სიტყვის გამოსვლისას ამბობენ, რომ მენეჯმენტის გადაწყვეტილება გაუგებარია. მათივე თქმით, გაუგებარია რა პრინციპით შეარჩიეს ის თანამშრომლები, რომლებსაც ახალი პირობები შესთავაზეს. ასევე, ისინი ამბობენ, რომ ახალი შეთავაზება გარანტიებს არ იძლევა და სამსახურიდან უპირობო გათავისუფლებას ნიშნავს.

როგორც თანამშრომლები ამბობენ, ახალი შეთავაზებით ისინი სამსახურში მაშინ მივლენ, როცა გამოიძახებენ. ახალგაზრდა იურისტთან ასოციაციის თავმჯდომარე და საზოგადოებრივი მაუწყებლის სამეურვეო საბჭოს ყოფილი წევრი, სულხან სალაძე ამბობს, რომ აღნიშნული ხელშეკრულება არ ავალდებულებს მენეჯმენტს წელიწადში ერთხელ მაინც გამოიძახოს ტექნიკური პერსონალი სამსახურში, რაც, მისივე თქმით, უპირობო გათავისუფლებას ნიშნავს.