კოლორადოს უნივერსიტეტისა და ბოსტონის ქალთა ჰოსპიტალის მიერ ჩატარებული კვლევით, რომელშიც 270 000 ადამიანი მონაწილეობდა, დადგინდა, რომ ის ადამიანები, რომლებიც ხანდახან მაინც ათენებენ ღამეს, მეორე ტიპის დიაბეტის მაღალი რისკის ქვეშ არიან. ამ ყველაფერს კი სიმსივნის და გულის დაავადებების განვითარების მაღალი შანსიც ემატება.

ახლახან გამოქვეყნებულ კვლევაში აღნიშნულია, რომ ერთი ღამის გათენებაც კი თქვენი სისხლის შემადგენლობას ცვლის და დაავადებების განვითარების მომატებულ რისკსაც სწორედ ეს განაპირობებს.

მსოფლიოში მილიონობით ადამიანი ღამის ცვლაში პერიოდულად ან მუდმივად მუშაობს. კვლევის ფარგლებში მეცნიერებმა ბრიტანული ორგანიზაციის მიერ მოპოვებული ინფორმაცია გაანალიზეს და ნახეს, რომ ადამიანებს, რომლებსაც პერიოდულად ღამის ცვლაში მუშაობა უწევთ, დიაბეტის განვითარების შანსი 45 პროცენტით მეტი აქვთ.

აღსანიშნავია, რომ ადამიანებს, რომლებიც მუდმივად ღამის ცვლაში მუშაობენ, დაავადების მომატებული რისკი არ ახასიათებდათ, როგორც ჩანს, მუდმივად ღამის ცვლაში მუშაობამ მათ ორგანიზმს ადაპტაციისა და ახალ რეჟიმზე მორგების საშუალება მისცა.

ახალი კვლევის ფარგლებში ავტორებმა ექვსი ახალგაზრდა მამაკაცი ექვსი დღის განმავლობაში სპეციალურ ოთახში მოათავსეს, სადაც მათი საკვები, წყალი, ფიზიკური აქტივობა, ძილი და სინათლე კონტროლდებოდა.

პირველი ორი დღის განმავლობაში ექსპერიმენტი სტანდარტული რეჟიმით მიმდინარეობდა.ორი დღის შემდეგ კი მეცნიერებმა რეჟიმი საპირისპიროთი შეცვალეს, ახლა მათ დღის განმავლობაში 8 საათი უნდა ეძინათ, ხოლო ღამე 8 საათის განმავლობაში ფხიზლად ყოფილიყვნენ.

ექსპერიმენტის მიმდინარეობის პროცესში მეცნიერები ცდისპირების სისხლში 1 129 სხვადასხვა ცილის რაოდენობასა და ქცევას აკვირდებოდნენ.

"რეჟიმის ცვლილების შემდეგ ჩვენ ვნახეთ, რომ ის ცილები, რომლებიც წესით ორგანიზმში დღე უნდა ცირკულირებდეს, მათ სისხლში მაქსიმალურ რაოდენობას ღამით აღწევდა, ხოლო ღამის ცილები - კი დღის განმავლობაში", - ამბობს კვლევის ავტორი ქრისტოფერ დეპნერი.

საბოლოოდ, ჩვენ დავაფიქსირეთ 129 სხვადასხვა ცილა, რომელთა ბიოლოგიური რიტმიც სრულად აირია.

ერთ-ერთი ასეთი ცილა გლუკაგონია, რომელიც ღვიძლიდან სისხლში შაქრის გამოთავისუფლებას ემსახურება. ბუნებრივ მდგომარეობაში გლუკაგონი მაღალი რაოდენობით ორგანიზმში დღის განმავლობაში გამოიყოფა, თუმცა ცდისპირებში გლუკაგონის გამოყოფის პიკი ღამით დაფიქსირდა, უფრო მეტიც, ღამე ცილის იმაზე მეტი რაოდენობა გამოიყო, ვიდრე ეს დღის განმავლობაში ხდება ხოლმე.

მეცნიერებმა ისიც დაადგინეს, რომ ღამის ცვლაში მომუშავე ადამიანები 10 პროცენტით უფრო ნაკლებ კალორიას წვავენ, ამის მიზეზი სავარაუდოდ ერთ-ერთი ცილის რეჟიმის დარღვევამ გამოიწვია, რომელიც ორგანიზმში ენერგიის გადამუშავებას არეგულირებს.

სისხლში არსებულ დაახლოებით 30 სხვადასხვა ცილას სპეციალური მუშაობის გრაფიკი აქვს. მათი უმეტესობა სისხლში შუა დღის 2 საათიდან ღამის 9 საათამდე გამოიყოფა. ეს ნიშნავს, რომ არარეგულარული რეჟიმის პირობებში აღებული სისხლის ანალიზები შესაძლოა ორგანიზმში მიმდინარე პროცესებს სათანადოდ ვერ ასახავდეს.

ექსპერიმენტის ავტორები აცხადებენ, რომ ამ რისკებისგან თავდასაცავად ყველაზე კარგი საშუალება ღამისთენებისთვის თავის არიდება, ჯანმრთელი საკვები, ვარჯიში და სტაბილური ძილის რეჟიმია.