ონტარიოში, კანადის პროვინციაში, მზესუმზირის ფერმის მფლობელმა ოჯახმა გადაწყვიტა დამატებითი შემოსავლის მიღების მიზნით, ფერმის კარი ფოტოგრაფებისთვის გაეღო.

რა თქმა უნდა, 1,3 კილომეტრის მანძილზე გადაჭიმული ფერმის მფლობელებმა თადარიგი თავიდანვე დაიჭირეს — ვიზიტორებისთვის პორტატული ტუალეტები დაამონტაჟეს და მათ დასახმარებლად 8 ადამიანი დაიქირავეს.

თუმცა ეს საკმარისი არ აღმოჩნდა და მათ გადაწყვეტილება მალევე ინანეს — აყვავებული მცენარეებით სავსე ულამაზესი ადგილი სელფების გადაღების მსურველებმა გადათელეს.

1,3 კილომეტრის სიგრძის ფერმაში სელფის გადაღების მსურველნი ყველგან იყვნენ.

"თავიდან ყველა გახარებული იყო, იცინოდა და სელფებს იღებდა. აქციის მეორე დღეს კი, ფერმაში მთელი ტორონტოს მოსახლეობა მოვიდა", - ყვება ფერმის მფლობელი.

ფერმის შესასვლელთან მანქანები მანამ მოგროვდნენ, სანამ ვიზიტორებისთვის კარი გაიღებოდა. შუადღისთვის, ტერიტორია მსურველებით იყო სავსე. პარკირება კი შესასვლელიდან კილომეტრით მოშორებითაც გრძელდებოდა.

ადგილზე მყოფ თანამშრომლებს სიტუაციის კონტროლი უჭირდა. ასობით ადამიანი ფერმაში საფასურის გადახდის გარეშე შედიოდა, ისინი მცენარეებს ამტვრევდნენ და ნაგავს ძირს ყრიდნენ.

ქაოსის გასამკლავებლად, ფერმის მფლობელებმა პოლიციას გამოუძახეს. მეზობლები ამბობდნენ, რომ მსურველები მათ ტერიტორიაზე აჩერებდნენ მანქანებს და მათ მცენარეებზე შარდავდნენ.

ფოტო: Instagram

პოლიციას ტერიტორიაზე 7 000-ზე მეტი მანქანა დახვდა, მაშინ, როცა ფერმის პარკინგი მხოლოდ 300 მანქანას იტევდა. ამის შემდეგ, სამართალდამცავებმა ოჯახს ფერმის დახურვა მოსთხოვა.

ფერმერები ზარალის ოდენობას შემოდგომამდე ვერ დაითვლიან, როდესაც მზესუმზირის კრეფის სეზონი დაიწყება. თუმცა მათი მთავარი საფიქრალი ახლა ისაა, რომ სელფის გადაღების მსურველებმა გაიგონ, რომ ფერმის მათთვის სამუდამოდ დაიხურა.

ფერმის მფლობელის თქმით, ფერმის დახურვის გადაწყვეტილების შემდეგ, ის ვიზიტორების მხრიდან აგრესიული მოპყრობის მსხვერპლი გახდა:

"მიყვიროდნენ, რომ 2 საათი მოუნდნენ ფერმამდე მოსვლას და ფოტოს გადაღებას იმსახურებდნენ".