"პუბლიკას" ფოტოგრაფი მინდია გაბაძე სოციალურ ქსელში წერს, რომ 22 აპრილს საქალაქო სასამართლოსთან დაკავებული გიორგი ჩხეიძის სასამართლო სხდომიდან მოსამართლე დავით თეთრაულმა გამოაძევა.

მოსამართლის თქმით, განცხადების დაწერისას, "გონივრული ვადა" (პროცესამდე ერთი საათი) არ იყო დაცული. ფოტოგრაფი წერს, რომ პროცესის შესახებ გიორგი ჩხეიძის ადვოკატებმაც და ახლობლებმაც მხოლოდ 30 წუთით ადრე გაიგეს.

"ამ წუთას მოსამართლე დავით თეთრაულმა გიორგი ჩხეიძის სასამართლო სხდომიდან გამომაძევა.

მიზეზი იყო ის, რომ შეკითხვა დავუსვი, თუ რატომ არ მაძლევდა პროცესის გადაღების უფლებას.

რამდენჯერმე განმიმარტა, რომ "გონივრული ვადა" (პროცესამდე 1 საათი) არ იყო დაცული განცხადების დაწერისას.

რომ ვკითხე, რომ ადმინისტრაციულ საქმეებზე რანაირად იყო შესაძლებელი გონივრული ვადის დაცვა იმ შემთხვევაში, როდესაც პროცესის შესახებ გიორგი ჩხეიძის ადვოკატებმაც და ახლობლებმაც 30 წუთით ადრე გაიგეს სხდომის შესახებ, ბ-ნმა თეთრაულმა ჩემი გაძევების ბრძანება გასცა და მანდატურებმა გამომსვეს გარეთ.

მაგარი დღეა — ამ პროცესამდე ნიკა კაციას საქმის სხდომიდან პოლიციელების ხელის რტყმით გამოვედი;

ბოლო დღეებია სისხლის საქმეებზე ვერ ვახერხებ ფოტოს გადაღებას და ამაზეც ვრცლად მოგვიანებით დავწერ", — წერს მინდია გაბაძე.

გიორგი ჩხეიძე სინდისის პატიმრის, საბა სხვიტარიძის პროცესის შემდეგ საქალაქო სასამართლოს ეზოში 22 აპრილს დააკავეს. ჩხეიძე ადმინისტრაციული წესით, პოლიციელის შეურაცხყოფის მუხლის საფუძველზეა დაკავებული. დაკავებულის ადვოკატის მარიკა არევაძის თქმით, ჩხეიძემ დაკავების დროს თავის არეში და სხეულზე ფიზიკური დაზიანებები მიიღო.