"ირაკლი ქარსელაძემ მიიღო გადაწყვეტილება სახელმწიფო თანამდებობის დატოვების შესახებ", — ამის შესახებ, ცოტა ხნის წინ, ბრიფინგზე ოცნების პრემიერმინისტრმა, ირაკლი კობახიძემ განაცხადა და საზოგადოებას "ოცნების" ხელისუფლების ინფრასტრუქტურის ახალი მინისტრი — რევაზ სოხაძე წარადგინა.

ირაკლი ქარსელაძემ ბიძინა ივანიშვილს და მთლიანად ოცნების გუნდს მადლობა გადაუხადა იმაში, რომ მნიშვნელოვანი პროექტების განხორციელების შესაძლებლობა მიეცა.

"წილად მხვდა ბედნიერება და პატივი, მონაწილეობა მიმეღო ქვეყნის აღმშენებლობაში. ძალიან მნიშვნელოვანი პროექტები განხორციელდა და ამ შესაძლებლობებისთვის მინდა დიდი მადლობა გადავუხადო ბატონ ბიძინა ივანიშვილს და მთლიანად ოცნების გუნდს. უმნიშვნელოვანესია ის შედეგები, რაც მივიღეთ. ქვეყანა განვითარების თვისობრივად უფრო მაღალ დონეზე ავიდა. შეუძლებელი იქნებოდა ამ ამოცანების შესრულება, რომ არა ერთიანი ძალისხმევა და გუნდი. მინდა, დიდი მადლობა გადავუხადო სამთავრობო გუნდს", – განაცხადა ქარსელაძემ.

რევაზ სოხაძემ პრემიერს გამოცხადებული ნდობისთვის მადლობა გადაუხადა.

"კარგად მესმის, რამხელა პასუხისმგებლობაა აღნიშნული სამინისტროს ხელმძღვანელობა. მინდა დიდი მადლობა ვუთხრა ირაკლი ქარსელაძეს, მთელი ქვეყანა ხედავდა ამ წლების განმავლობაში რამდენად დიდი საქმე კეთდებოდა ამ მიმართულებით საქართველოში. მინდა, მადლობა გადავუხადოთ თბილისის საკრებულოს თავმჯდომარეს, მერს, საკრებულოს წევრებს, მერიის თანამშრომლებს. წლების განმავლობაში მქონდა საშუალება მათთან ერთად ამ ქალაქში ძალიან მნიშვნელოვანი პროექტები განგვეხორციელებინა. კიდევ ერთხელ მადლობა პრემიერო, მთელ გუნდს ნდობისთვის. იმედია, ჩვენი მოღვაწეობა წარმატებული იქნება", — თქვა სოხაძემ.

აღსანიშნავია, რომ ქარსელაძეს რეგიონული განვითარებისა და ინფრასტრუქტურის სამინისტროს დაყოფის შემდეგ, ინფრასტრუქტურის სამინისტრო უნდა ჩაებარებინა. ის 19 აპრილის ბრძანებით ამ თანამდებობაზე უკვე იყო დანიშნული. რეგიონული განვითარებისა და ინფრასტრუქტურის სამინისტროს 2021 წლის 22 თებერვლიდან ხელმძღვანელობდა.

რაც შეეხება რევაზ სოხაძეს, 2017-2021 წლებში თბილისის მუნიციპალიტეტის VI მოწვევის საკრებულოს ურბანული დაგეგმარებისა და საქალაქო მეურნეობის კომისიის თავმჯდომარე იყო, 2021 წლიდან დღემდე — თბილისის მუნიციპალიტეტის VII მოწვევის საკრებულოს წევრი.