24 აპრილს, ოპოზიციური პარტიების წარმომადგენლები ეუთოს გენერალურ მდივანს, ფერიდუნ სინირლიოღლუს შეხვდნენ.

შეხვედრას დაესწრნენ — ლელო-ძლიერი საქართველოსა და კოალიცია ერთიანობა ნაციონალური მოძრაობის წარმომადგენლები.

კოალიცია ცვლილებისთვის წარმომადგენლებმა ეუთოს გენერალურ მდივანთან შეხვედრაზე უარი თქვეს.

რაც შეეხება პარტია გახარია საქართველოსთვის, გავრცელებული ინფორმაციით ისინი ეუთოს გენერალურ მდივანს დღეს უკვე შეხვდნენ.

ლელო-ძლიერი საქართველოს ლიდერმა, ბადრი ჯაფარიძემ ჟურნალისტებთან განაცხადა, რომ შეხვედრაზე ოპოზიციურმა პარტიებმა ისაუბრეს, თუ როგორ არ ითვალისწინებს ქართული ოცნება ეუთო/ოდირის არც ერთი დასკვნა არჩევნებთან დაკავშირებით არ გაითვალისწინა.

"ეუთო, პირველ რიგში, არის უსაფრთხოების შესახებ კონცენტრირებული ორგანიზაცია და ოკუპაცია არის საქართველოს უდიდესი გამოწვევა ჩვენი ქვეყნის უსაფრთხოებისთვის, ამაზე იყო საუბარი. იყო საუბარი ასევე იმაზე, რომ საქართველოში დღეს გვაქვს სრული დემოკრატიული უკუსვლა. საუბარი იყო პოლიტიკურ პატიმრებზე, უდანაშაულო ადამიანებზე, რომლებიც უკანონოდ არიან დღეს საპატიმროში. საუბარი იყო იმაზე რომ ეუთო/ოდირის არც ერთი დასკვნა არჩევნებთან დაკავშირებით რომელიც იქნა ოფიციალურად გამოქვეყნებული და გაგზავნილი დღევანდელი დე ფაქტო ხელისუფლებისადმი, არც ერთი მათგანი არ იქნა გათვალისწინებული და უფრო მეტიც, მიღებულ იქნა კანონი, რომელიც პირდაპირ ეწინააღმდეგება ეუთო/ოდირის დასკვნებს," — განაცხადა ბადრი ჯაფარიძემ.

ნაციონალური მოძრაობის თავმჯდომარე თინა ბოკუჩავას თქმით, ეუთოს გენერალურ მდივანს გაუზიარეს მათი მოსაზრება, რომ ნებისმიერი ამგვარი საერთაშორისო ვიზიტი სამთავრობო პროპაგანდას შესაძლებლობას აძლევს, ეს მათთვის ლეგიტიმაციის მინიჭების მიზნით გამოიყენონ.

"ეს წუხილი, რა თქმა უნდა, ბატონ გენერალურ მდივანსაც ძალიან ღიად გავუზიარეთ, იმიტომ, რომ ამაში დასამალი არაფერი არ არის. რაც შეეხება სხვა საკითხებს, რომელიც ჩვენ განვიხილეთ, კიდევ ერთხელ გავაჟღერეთ საერთო დემოკრატიული ძალების მოთხოვნა და ქართველ ხალხის, რაც ყველაზე მნიშვნელოვანია, რომლის ირგვლივაც კონსოლიდირებულია დღეს საქართველოს მოქალაქეების აბსოლუტური უმრავლესობა, ეს არის ახალი საპარლამენტო დემოკრატიული თავისუფალი არჩევნები," — თქვა ბოკუჩავამ.

პარია გახარია საქართველოსთვის წევრმა, ანა ბუჩუკურმა ხაზი გაუსვა, რომ ვიზიტი რეგიონულია და ის, მათ შორის, ეხება უსაფრთხოების კონტექსტს:

"გიორგი გახარიას მხრიდან, პირველ რიგში, ყურადღება გამახვილდა პოლიტიკური პატიმრების გათავისუფლების აუცილებლობაზე, მათ შორის ქალბატონი მზია ამაღლობელის მნიშვნელოვან საქმესთან დაკავშირებით და რა თქმა უნდა, საუბარი შეეხო არჩევნების საკითხსაც," — თქვა ბუჩუკურმა.

შეგახსენებთ, ეუთოს გენერალური მდივანი ოპოზიციურ პარტიებამდე ქართული ოცნების წარმომადგენლებს შეხვდა.