"აგრო-მეურნეობის, ვაჭრობისა და მრეწველობის" ("ლაბორი") პროფკავშირის ოფისში ჩხრეკა მიმდინარეობს. როგორც "ლაბორის" იურისტი განმარტავს, საგამოძიებო მოქმედებების საფუძველი მათთვის უცნობია — ისინი არ დაეთანხმნენ გამომძიებლების მიერ წარდგენილ განჩინებას. თუმცა, ამის მიუხედავად, ოფისში ჩხრეკა რამდენიმე საათია მაინც მიმდინარეობს.

"სასამართლო განჩინება წარმოგვიდგინა გამომძიებელმა, რომლის თანახმადაც 4 მისამართზე აპირებს ჩხრეკის ჩატარებას. ოღონდ, განჩინებაში არ აქვთ მითითებული რა მუხლით მიმდინარეობს ეს ჩხრეკა. ჩვენ არ ვეთანხმებით ამ განჩინებას. ვაპირებთ, გასაჩივრებას," — აცხადებს "ლაბორის" იურისტი.

პროფკავშირების წევრმა, მახარე პატაშურმა მედიასთან საუბრისას განმარტა, რომ ჩხრეკის ლოკაციებიდან ერთ-ერთი ჰუალინგ-ცენტრიც არის, სადაც ორგანიზაციამ 2 თვის წინ, ერთჯერადად, სხდომა მოეწყო.

"ამ მომენტში 4 ლოკაციაზე მიმდინარეობს ჩხრეკა: ჩვენი ოფისი, მეორე თავმჯდომარის სახლი, ძველი ოფისი, რომელიც დიდი ხანია დატოვებული გვაქვს და არანაირი დოკუმენტაცია არც იქ და არც თავმჯდომარის სახლში არ არის. მეოთხე [ჩხრეკის ლოკაცია] არის ჰუალინგის სივრცე, რომელიც 2 თვის წინ გვქონდა ნაქირავები, რათა გამგეობის სხდომა მოგვეწყო.

განჩინებაში არ ეწერა, უშუალოდ, რატომ მიმდინარეობს ჩხრეკა. ჩვენ ძალიან აქტიურად ვუჭერდით მხარს იურიდიულად და ფინანსურად ჭიათურის პროტესტს. ასევე 1-ელ მაისს მასშტაბური აქციის გამართვას ვაპირებთ და შეიძლება ამასთანაც იყოს დაკავშირებული ეს ყველაფერი," — განაცხადა მახარე პატაშურმა.

"ლაბორის" წევრ დავით ლომჯარიას განცხადებით, განჩინებაში თანხების მითვისებაზე და საბუთების გაყალბებაზეა საუბარი.

"თავიდანვე ბუნდოვანი იყო ყველაფერი, რადგან განჩინებაში არ არის ზუსტად მითითებული, თუ რა უნდა მოიძებნოს. მხოლოდ იმით შემოიფარგლნენ, რომ შეგიძლიათ გაასაჩივროთო.

ორ მუხლზეა საუბარი, ერთი უკავშირდება თანხების მითვისებას, მეორე — საბუთების გაყალბებას," — განაცხადა დავით ლომჯარიამ.

საგამოძიებო სამსახურის წარმომადგენელმა ოფისში მყოფ "ლაბორის" თანამშრომელს ლაივ-ვიდეო გაათიშვინა. "ლაბორის" ოფისში და კიდევ 3 ლოკაციაზე საგამოძიებო მოქმედება ამ დრომდე მიმდინარეობს.

ინტერპრესნიუსს ფინანსთა სამინისტროს საგამოძიებო სამსახურში განუმარტეს, რომ საგამოძიებო უწყება პროფკავშირ "ლაბორში" საგამოძიებო მოქმედებებს სასამართლოს განჩინების საფუძველზე ატარებს. სხვა დეტალების შესახებ, უწყება განმარტებებს, ამ ეტაპზე, არ აკეთებს.