1-ელ მაისს 10 პროფკავშირი და საზოგადოებრივი გაერთიანებები კოლმეურნეობის მოედანზე შეიკრიბებიან და მსვლელობას გამართავენ. ამ ფორმით ისინი საჯარო მოხელეების მიმართ რეპრესიებსა და ქვეყანაში არსებული უსამართლო სოციალური პოლიტიკას გააპროტესტებენ.

ამის შესახებ დღეს გამართულ ბრიფინგზე საჯარო მოსამსახურეთა პროფესიული კავშირის თანათავმჯდომარემ, კახი სამხარაძემ თქვა.

მისი თქმით, საჯარო სამსახურში მიმდინარე რეპრესიები კიდევ უფრო ფართოვდება და იზრდება რეპრესირებული საჯარო მოხელეების რიცხვი.

"საჯარო სამსახურში მიმდინარე რეპრესიები კიდევ უფრო ფართოვდება და იზრდება რეპრესირებული საჯარო მოხელეების რიცხვი. მხოლოდ ერთი უწყებიდან, საჯარო რეესტრიდან განთავისუფლდა უკვე 200-ზე მეტი საჯარო მოსამსახურე და ზოგადად, მთელს საჯარო სექტორში გათავისუფლებული თანამშრომლების რაოდენობა 800 ადამიანს აჭარბებს.

განათლების სამინისტროში 16 აპრილს გამოცხადდა რეორგანიზაცია, რომელიც ამ ეტაპზე ეხება უშუალოდ სამინისტროს ცენტრალურ აპარატს და როგორც ჩვენთვის გახდა ცნობილი, უკვე გაუშვეს რამდენიმე თანამშრომელი მიუხედავად იმისა, რომ რეორგანიზაცია კიდევ 2 თვე გაგრძელდება, ასევე არსებობს მოლოდინი, რომ რეორგანიზაციის პროცესი შეეხება განათლების სამინისტროს სისტემაში არსებულ სსიპებს, მათ შორის სასწავლი დაწესებულებებს.

ჩვენი ინფორმაციით, სახელმწიფო უსაფრთხოების სამსახურმა კიდევ უფრო აქტიურად დაიწყო ჩარევა განათლების სისტემაში და ცდილობს წინასაარჩევნოდ მოასუფთაოს ეს სივრცეც. მიმდინარე მოვლენების გამოძახილად საქართველოში მოქმედი 10 დამოუკიდებელი პროფესიული კავშირი და სხვა საზოგადოებრივი გაერთიანებები ვგეგმავთ პირველ მაისს კოლმეურნეობის მოედნიდან მსვლელობას რათა გამოვხატოთ პროტესტი საჯარო მოხელეების მიმართ რეპრესიებისა და ზოგადად ქვეყანაში არსებული უსამართლო სოციალური პოლიტიკის გამო", — თქვა სამხარაძემ.