ახალ ზელანდიაში ჩაატარეს ექსპერიმენტი, რომლის ფარგლებშიც კომპანიამ ტრადიციული სამუშაო კვირა 4 დღემდე შეამცირა, ანუ დასაქმებულები კვირაში 2-ის ნაცვლად სამი დღე ისვენებდნენ. ექსპერიმენტი იმდენად წარმატებული აღმოჩნდა, რომ კომპანია აპირებს, მუშაობა ექსპერიმენტის დასრულების შემდეგაც ამ რეჟიმით გააგრძელოს.

ვარაუდი, რომ სამუშაო საათების შემცირება თანამშრომლების ცხოვრების ხარისხს მყისიერად აუმჯობესებს, აქამდეც არსებობდა, თუმცა ეს კვლევა იმით იყო გამორჩეული, რომ თანამშრომლებს გაცდენილი დღის მიუხედავად, მე-5 დღის ხელფასი მაინც ერიცხებოდათ.

ტრადიციული მიდგომებით, შესაძლოა, ეს მოსაზრება აბსურდად ჩავთვალოთ, თუმცა კომპანიის დამფუძნებლის თქმით, ეს ერთი შეხედვით სარისკო გადაწყვეტილება ძალიან წარმატებული გამოდგა.

თანამშრომლების ცხოვრების ხარისხი ექსპერიმენტის მსვლელობის დროს 25 პროცენტით გაუმჯობესდა.

დამოუკიდებელმა ექსპერტებმა კომპანიის თანამშრომლების სტრესის და დაძაბულობის დონეები განსაზღვრეს და აღმოაჩინეს, რომ ექსპერიმენტის მსვლელობის განმავლობაში სტრესის დონე 7%-ით შემცირდა, თანამშრომლების ჩართულობა სამსახურეობრივ ცხოვრებაში კი 20%-ით გაიზარდა.

რა თქმა უნდა, ეს შედეგები მოულოდნელი არ არის, თუ გავითვალისწინებთ რომ თანამშრომლები ერთი დღის გაცდენის მიუხედავად მაინც სრულ ხელფასს იღებდნენ, მაგრამ განსაცვიფრებელი ისაა, რომ კომპანიის შედეგები ოდნავაც არ გაუარესებულა. კომპანიის ხელმძღვანელობამ დაადასტურა, რომ ექსპერიმენტის დროს მათი მოგება არ შემცირებულა.

კომპანიის დამფუძნებელი ფიქრობს, რომ ისინი შესაძლოა მუშაობის ახალ რეჟიმზე პერმანენტულად გადაერთონ. გასათვალისწინებელია ისიც, როგორი იქნება ამ მოდელის შედეგები ხანგრძლივ პერიოდში.

თქვენ როგორ ფიქრობთ, გონივრულია სამუშაო დღეების შემცირება?