თუ უზარმაზარ ღია ოფისში თქვენს თანამშრომლებთან ერთად მუშაობა გიჭირთ და პატარა საქმეებზე კონცენტრირებასაც ვერ ახერხებთ, თქვენ მარტო არ ხართ. ახალი კვლევით დასტურდება, რომ ასეთი განლაგება კოლეგებთან კოლაბორაციას გაზრდის ნაცვლად, ამცირებს.

ჰარვარდის კვლევამ აჩვენა, რომ როცა თანამშრომლები ტრადიციული ოფისებიდან ღია სივრცეში ინაცვლებდნენ, მათი პროდუქტიულობა მცირდებოდა.

კვლევის ხელმძღვანელმა, ორგანიზაციული ქცევის პროფესორმა, ეთან ბერნშტეინმა შეისწავლა ორგანიზაცია, რომელმაც "კედლებს ომი გამოუცხადა". ბერნშტეინმა კომპანიის თანამშრომლებს სთხოვა, სპეციალური მოწყობილობა ეტარებინათ, რომელიც ადამიანებს შორის პირისპირ კონტაქტის სიხშირეს ზომავდა.

შედეგების ანალიზის შედეგად დადგინდა, რომ გაუტიხრავ სივრცეში გადანაცვლების შემდეგ კოლეგებს შორის საუბრებმა და მათმა პროდუქტიულობამ იკლო. თუ დახურულ სივრცეში ერთ ადამიანზე ინტერაქციის 5.8 საათი მოდიოდა (სამ კვირაში), ახალ გარემოში ეს მაჩვენებელი 1.7 საათამდე შემცირდა.

გაგზავნილი იმეილების რიცხვი 56%-ით გაიზარდა, ჩატში წერილების რაოდენობა კი - 67%-ით. მკვლევარების აზრით, ასე ინაზღაურებდნენ საცდელი პირები პირადი სივრცის დანაკლისს, რომელიც კედლების გაუქმებამ გამოიწვია.

ფიზიკური საზღვრები ადამიანებს "გარემოს აღქმაში და იმის განსაზღვრაში ეხმარება, ვინ შეიძლება უყურებდეს მათ და ვინ - არა, ვის აქვს ინფორმაცია და ვის - არა, ვინ რას აკონტროლებს და ვინ რაზეა პასუხისმგებელი", - ახსნა ბერნშტეინმა.

მართალია, ღია ოფისი კომპანიას კედლებიან მოდელზე ბევრად იაფი უჯდება (ნაკლები ოთახი ნაკლებ ქირას გულისხმობს და გარემონტებაც ბევრად უფრო ადვილია), თუმცა "გაადვილებული თანამშრომლობის" კეთილშობილური იდეის გამოცლის შემთხვევაში, ბიზნესის მფლობელებს, სხვა მოდელზე გადაწყობის გარდა, სხვა გზა არ რჩებათ.

თუ თანამშრომლებმა კომუნიკაციისთვის მაინც ელფოსტა და ჩატი უნდა გამოიყენონ, მათ არანაკლები წარმატებით სახლიდანაც შეუძლიათ იმუშავონ, რაც კომპანიის ხარჯებს კიდევ უფრო შეამცირებს.