აშშ-ის პრეზიდენტმა, დონალდ ტრამპმა განაცხადა, რომ დიდი ბრიტანეთის პრემიერ-მინისტრის, ტერეზა მეის "ბრექსიტის" გეგმა აშშ-სთან სავაჭრო შეთანხმებას ჩაშლის. ამის შესახებ პრეზიდენტმა The Sun-თან ინტერვიუში ისაუბრა.

აშშ-ს პრეზიდენტმა, ასევე, იმედი გამოთქვა, რომ ტერეზა მეის პოლიტიკით უკმაყოფილო საგარეო საქმეთა ყოფილი მინისტრი, ბორის ჯონსონი მთავრობაში დაბრუნდება. ტრამპმა აღნიშნა, რომ ჯონსონი შესანიშნავი პრემიერ-მინისტრი იქნება.

ტრამპის განცხადებაზე დიდი ბრიტანეთის ოფიციალურ პირებს განმარტება ჯერ არ გაუკეთებიათ.

ხუთშაბათს, 12 ივლისს ბრიუსელში ნატოს სამიტის შემდეგ დონალდ ტრამპი და მისი ცოლი, მელანია ტრამპი ოფიციალური ვიზიტით დიდ ბრიტანეთში გაემგზავრნენ. The Sun-ისთვის მიცემული ინტერვიუს შესახებ კი ოფიციალური ვახშმის დროს გახდა ცნობილი.

ფოტო: Reuters

ინტერვიუში დონალდ ტრამპი ამბობს, რომ "ბრექსიტის" შემდეგ ევროკავშირისა და დიდი ბრიტანეთის ურთიერთობის დოკუმენტი განსხვავდება იმ პირობებისგან, რასაც მოსახლეობამ რეფერენდუმზე მხარი დაუჭირა.

12 ივლისს ბრიტანეთის ხელისუფლებამ ევროკავშირთან გრძელვადიანი ურთიერთობის მშენებლობის შესახებ წინადადებათა პაკეტი გამოაქვეყნა. გეგმა მიზნად ისახავს ჩრდილოეთ ირლანდიისთვის ვაჭრობის შემსუბუქებას და დიდი ბრიტანეთისთვის გლობალური სავაჭრო შეთანხმების დამყარებას.

მაგრამ მას შემდეგ, რაც მთავრობის წარმომადგენლებმა დოკუმენტზე შეთანხმებას მიაღწიეს, "ბრექსიტის" მთავარმა მხარდამჭერებმა, ბორის ჯონსონმა და "ბრექსიტის" საკითხების მინისტრმა, დევიდ დევისმა თანამდებობები დატოვეს.