შინაგან საქმეთა სამინისტრომ ამერიკის შეერთებული შტატების სანადირო თოფით მოკლულ მოქალაქეზე გვამის აღმოჩენიდან ორი დღის შემდეგ განსხვავებულ ინფორმაციას ავრცელებს.

უწყებამ თავდაპირველად თქვა, რომ აღმოჩენილ ცხედრებს პირველადი დათავლიერებით დაზიანება არ აღენიშნებოდათ. თუმცა, მას შემდეგ, რაც სოციალურ ქსელებში იწერებოდა, რომ წყვილი სანადირო თოფით იყო მოკლული, შსს–მ განმარტა, რომ ცოლ–ქმარი და მათი შვილი მოკლულია. ახალ, 9 ივლისის განცხადებაში შსს–ს წარმოამდგენელმა აქცენტი გააკეთა იმაზე, რომ ქალის ცხედარს ძალადობის კვალი არ ეტყობოდა. არაფერი უთქვამთ კაცის ცხედარზე, თმცა აღნიშნეს, რომ სამედიცინო ექსპერტიზის პირველადი მონაცემების მიღების შემდეგ საქმე განზრახ მკვლელობის მუხლით გადაკვალიფიცირდა.

On.ge შინაგან საქმეთა სამინისტროს პრესსამსახურს დაუკავშირდა და ჰკითხა, რატომ იყო 7 ივლისს გავრცელებულ განცხადებაში იარაღით მოკლულ პირზე, რომ "ძალადობის კვალი არ აღენიშნებოდა". უწყებაში განმარტეს, რომ ოფიციალურ განცხადებებში, ექსპერტიზის დასკვნის მიღებამდე ყოველთვის მსგავსი შინაარსის ინფორმაციას ავრცელებენ ხოლმე.

საქმის დეტალები

უწყების განცხადებით, ქალი ჩანჩქერის პირას, გარდაცვლილი იპოვეს და პირველადი დათვალიერების შედეგად ძალადობის კვალი არ აღენიშნებოდა. 7 ივლისს კი კაცის, რაიან სმიტის ცხედარი ჩანჩქერის მიმდებარე ტერიტორიაზე აღმოაჩინეს. ამავე დღეს შსს-მ განაცხადა, რომ პირველადი დათვალიერებით არც ერთ გარდაცვლილს ძალადობის ნიშნები არ აღენიშნებოდა.

შსს-ს განმარტებით, თავდაპირველად გამოძიება სისხლის სამართლის კოდექსის 116-ე მუხლის მე-2 ნაწილით დაიწყო, რაც გაუფრთხილებლობით სიცოცხლის მოსპობას გულისხმობს. სამედიცინო ექსპერტიზის პირველადი მონაცემების მიღების შემდეგ საქმე განზრახ მკვლელობის მუხლით გადაკვალიფიცირდა.

როგორც უწყების განცხადებაშია ნათქვამი, საგამოძიებო ექსპერიმენტის ჩატარების შედეგად სამართალდამცველებმა აღმოაჩინეს 2014 წელს დაბადებული მცირეწლოვნის ცხედარი 9 ივლისს იპოვეს.

გამოძიება დამამძიმებელ გარემოებაში ჩადენილი, ორი ან მეტი პირის, მათ შორის, დამნაშავისათვის წინასწარი შეცნობით არასრულწლოვნის განზრახ მკვლელობის ფაქტზე, საქართველოს სსკ-ს 109-ე მუხლის მე-2 ნაწილის "ბ" და მე-3 ნაწილის "ა" ქვეპუნქტით მიმდინარეობს.

როგორც შსს აცხადებს, გამოძიების ფარგლებში გარდაცვლილთა ცხედრებს უტარდება შესაბამისი ექსპერტიზა. ჩადენილი დანაშაული უვადო თავისუფლების აღკვეთას ითვალისწინებს. ბრალდებულის შერაცხადობის საკითხის გასარკვევად კი ჩატარდება ფსიქიატრიული ექსპერტიზა.