ქართველმა სტარტაპერებმა: დავით მიზანდარმა, ნიკა გუჯეჯიანმა და გიორგი მამასახლისმა გადაწყვიტეს, უძველესი ჭურჭლის, ქვევრის შესაქმნელად თანამედროვე ტექნოლოგიები გამოეყენებინათ. მათ ქვევრი, არც მეტი, არც ნაკლები - ამობეჭდეს.

მარკეტერის ინფორმაციით, მათ ჰოლანდიაში მიაკვლიეს კერამიკოსს და მასთან თანამშრომლობითა და ჯიტას მხარდაჭერით, 3D ტექნოლოგიით პირველი ქვევრის პროტოტიპი დაბეჭდეს.

შეგახსენებთ, რომ 2017 წლის დასასრულს, თბილისიდან 50 კილომეტრში მდებარე ანტიკურ სოფლებში, სახელად გადაჭრილი გორა და შულავერის გორა, ღვინით გაჟღენთილი ქვევრი და სხვა თიხის ჭურჭელი აღმოაჩინეს. ისინი 80 საუკუნის წინ იყო შექმნილი. ამ მსოფლიო მნიშვნელობის აღმოჩენამ დაადასტურა, რომ საქართველო მეღვინეობის სამშობლოა. მოგვიანებით, საქართველოში აღმოჩენილ 8 000 წლის ქვევრში ნაპოვნი ღვინის ქიმიური ნალექი, როგორც უძველესი ღვინო, გინესის რეკორდების წიგნში შევიდა.

ფოტო: QVEVRI.XYZ

ფოტო: QVEVRI.XYZ

ფოტო: QVEVRI.XYZ

3D ქვევრის შექმნის იდეა ბაზარზე ხარისხიანი ქვევრების სიმცირემ განაპირობა. იმისთვის, რომ ქვევრმა ღვინოს განსაკუთრებული გემოვნური თვისებები მიანიჭოს, აუცილებელია ჭურჭლის შექმნის პროცესში ყველა მნიშვნელოვანი წესი იყოს გათვალისწინებული. სტარტაპერების თქმით, ამ კუთხით ბევრი პრობლემა გვაქვს: გამოსაწვავ შენობებში ტემპერატურის კონტროლის არარსებობის გამო, თიხა ხშირად იბზარება ან სულაც - ტყდება. ხშირია შემთხვევები, როცა თიხა ზედმეტად ფორიანია და ღვინოს აპარებს. მართალია, დანაკარგების რისკს გასანათვლა ამცირებს, მაგრამ ამ შემთხვევაში თიხა ვეღარ სუნთქავს და ჩვეულებრივ "ბოცად" გარდაიქმნება.

მნიშვნელოვანია ისიც, რომ თიხისგან ქვევრის გამოყვანას საშუალოდ 1 თვე სჭირდება. 3D პრინტერის საშუალებით კი, ქვევრი ერთი ამოსუნთქვით, რამდენიმე საათში იბეჭდება.

3D ქვევრზე სხვა ინფორმაციის მისაღებად შეგიძლიათ სტარტაპერების საიტს ეწვიოთ.