საქართველოს პარლამენტის დეპუტატის, ლევან კობერიძის განცხადებით, მმართველ გუნდს პრობლემები და გამოწვევები მართლმსაჯულების ნაწილში აქვს, რასაც მთავრობამ კონკრეტული ნაბიჯებით უნდა უპასუხოს. ამის შესახებ ლევან კობერიძემ ტელეკომპანია იმედის ეთერში ისაუბრა.

მისი თქმით, თუ ხელისუფლება მართლმსაჯულების ნაწილში მნიშვნელოვან წინსვლას ვერ ახერხებს, მაშინ რიგგარეშე საპარლამენტო არჩევნების საკითხს დააყენებდა.

"თუ სამართლის აღსრულებასთან დაკავშირებულ ყველა კითხვას პასუხები არ გაეცემა, სრულიად ლეგიტიმური იქნება მოთხოვნა ვადამდელი საპარლამენტო არჩევნების დანიშვნის შესახებ", - განაცხადა დეპუტატმა ლევან კობერიძემ.

დეპუტატის განცხადებით, მისთვის პრემიერ-მინისტრის გადაწყვეტილება მოსალოდნელი არ იყო.

"პრემიერმა ქვეყანა ჩაიბარა 2%-იანი ეკონომიკური ზრდის მაჩვენებლით და დღეს ეკონომიკური ზრდა არის 6.5%. ამ ხნის განმავლობაში გვქონდა ძალიან სერიოზული წინსვლა ჩვენს სტრატეგიულ პარტნიორებთან. ქვეყანაში ნელი, მაგრამ სტაბილური წინსვლა შეინიშნება და მთელი რიგი მიმართულებით გვაქვს მხოლოდ დადებითი ძვრები. ეკონომიკურ პარამეტრებში რა თქმა უნდა, სასურველია უფრო მეტი ზრდა და უფრო მეტი სისწრაფე, მაგრამ ვთვლი, რომ არაფერი მიუთითებს, რომ ეს შეიძლება ყოფილიყო პრემიერის გადადგომის მიზეზი", - განაცხადა ლევან კობერიძემ.

მისი თქმით, გაცილებით უფრო მნიშვნელოვანი პრობლემებია სამართლიანობის შეგრძნებასთან და რიგ საქმეებზე სასჯელის დადგომის აუცილებლობასთან დაკავშირებით, მათ შორის დავით სარალიძის საქმეზე.

რა ხდება პრემიერ-მინისტრის გადადგომის შემდეგ

ქართული ოცნების მმართველობის პერიოდში მესამე პრემიერ-მინისტრმა გიორგი კვირიკაშვილმა გუშინ, 13 ივნისს პრემიერ-მინისტრის თანამდებობა დატოვა. საქართველოს კონსტიტუციის თანახმად, პრემიერის გადადგომასთან ერთად, მთავრობის შემადგენლობაც გადამდგარად ითვლება.

პრემიერ-მინისტრის გადადგომის შემდეგ, საქართველოს კონსტიტუციის მიხედვით, პრეზიდენტმა არსებულ მთავრობას დააკისრა ვალდებულება ახალი მთავრობის არჩევამდე თავისი მოვალეობა შეასრულოს. ამის შემდეგ, შვიდი დღის განმავლობაში, საპარლამენტო უმრავლესობამ პრეზიდენტს პრემიერ-მინისტრობის კანდიდატი უნდა შესთავაზოს, რომელსაც იგი უკვე პარლამენტს წარუდგენს განსახილველად. პრემიერ-მინისტრის კანდიდატი 14 ივნისს უმრავლესობის გაფართოებულ სხდომაზე გახდება ცნობილი.

ასევე შვიდდღიან ვადაში პრემიერ-მინისტრობის კანდიდატმა უნდა ჩამოაყალიბოს მთავრობის შემადგენლობა და პარლამენტს ნდობის მისაღებად უნდა წარუდგინოს. მან ასევე უნდა წარადგინოს სამთავრობო პროგრამაც.

ამის შემდეგ, კიდევ შვიდი დღის განმავლობაში, პარლამენტმა ეს ყველაფერი უნდა განიხილოს და კენჭი უყაროს. მაქსიმუმ 21 დღეში ახალი მთავრობა უნდა დაკომპლექტეს.