მზია ამაღლობელის ადვოკატმა, მაია მწარიაშვილმა ტელეკომპანია პირველის ეთერში "ბათუმელებისა" და "'ნეტგაზეთის" დამფუძნებლის ამაღლობელის ჯანმრთელობის მდგომარეობის შესახებ ისაუბრა.

ადვოკატის თქმით, მათ მიერ საქმეში წარდგენილი დოკუმენტებით ამაღლობელის დაკავებამდე არსებული სამედიცინო დოკუმენტები და დაკავების შემდგომ უკვე კლინიკა "ვივამედში" ჩატარებული კვლევები აჩვენებს, რომ მზია ამაღლობელს მხედველობასთან დაკავშირებით სერიოზული პრობლემები აქვს.

"მისი დაავადებაა ― კერატოკონუსი, რომელიც ძალიან ცუდი, მძიმე და პროგრესირებადი თავლის დაავადებაა, ამ დაავადების გამო დაკავებამდეც კი მას ცალ თვალში მხედველობა ჰქონდა მხოლოდ 2% , მეორე თვალში 30% და იყო შანსი რომ სათვალით გაზრდილიყო ეს მხედველობა 90%-მდე.

ბოლო კვლევით, "ვივამედის" თებერვლის კვლევით, მისი ამ შედარებით ჯანმრთელი თავლის მხედველობა 10%-მდეა დასული, რომელიც შესაძლებელია სათვალის გამოყენების შემთხვევაში გაიზარდოს მხოლოდ 40%-მდე, მეტი არა.

ამასთან ეს კერატოკონუსი, რომელიც მხოლოდ ერთ თვალზე ჰქონდა, ასევე სახალხო დამცველის მიერ შედგენილი კომისიის დასკვნის თანახმად, აქვს უკვე ორივე თვალზე.

მას შემდეგ, თებერვლის შემდეგ, არავინ არ იცის როგორია მისი ამ თვალის მდგომარეობდა. თავად ეს მოცემულობაც თებერვლის, არის ძალიან მძიმე, მას მერე [ამაღლობელს] არც რაიმე კვლევა ჩაუტარებია ამ თვალსაზრისით და არც რაიმე მკურნალობა.

თავიდანვე, ვინაიდან მზიას არ უნდოდა რომ ჩვენ მეტი ხაზგასმით გვესაუბრა მის ჯანმრთელობაზე, არც მაშინ როდესაც ის შიმშილობდა, არასოდეს ასე აქცენტირებას არ ვაკეთებდით მის ჯანმრთელობის მდგომარეობასთან დაკავშირებით, მაგრამ არის რაღაც საზღვარი. ჩვენ თუ არ მივუთითეთ ამ დოკუმენტებზე ასე ხაზგასმით სასამართლოს და ბრალდებას, ისინი არასოდეს არ ნახავენ ამ დოკუმენტებს და არასოდეს არც საზოგადოებას არ ეცოდინება სინამდვილეში რა მძიმე მდგომარეობა აქვს მას", ― აღნიშნა გადაცემაში საუბრისას მაია მწარიაშვილმა.