საქართველომ ევროპის საბჭოს ფარგლებში რუსეთის წინააღმდეგ სპეციალური ტრიბუნალის შექმნას ხმა არ მისცა. სომხეთთან და აზერბაიჯანთან ერთად, საქართველომ კენჭისყრაში მონაწილეობა არ მიიღო. ინფორმაციას Netgazeti ავრცელებს და წერს, მინისტრთა კომიტეტზე კენჭისყრის შედეგები დახურულია, თუმცა 26 მაისს, ევროპის საბჭოს საპარლამენტო ასამბლეაში (PACE) გამართულ დებატებზე საქართველოს პოზიცია უკრაინელმა დეპუტატმა ოლექსი გონჩარენკომ გააჟღერა.

"წევრი ქვეყნებიდან ექვსი ქვეყანაა, რომლებმაც ხელი არ მოაწერეს ამ შეთანხმებას. ამ ექვსი ქვეყნიდან ერთ-ერთი საქართველოა" — განაცხადა მან.

გამოცემის ცნობით, 24 ივნისის ევროპის საბჭოს მინისტრთა კომიტეტის სხდომაზე ტრიბუნალის შექმნის წინააღმდეგ ხმა მისცა უნგრეთმა, თურქეთმა და სერბეთმა.

24 ივნისს ევროპის საბჭოს მინისტრთა კომიტეტმა ალან ბერსეს აღნიშნულ შეთანხმებაზე ხელის მოწერის უფლებამოსილება მიანიჭა. საქართველომ, რომელმაც აპრილში მხარი დაუჭირა უკრაინასა და ევროპის საბჭოს შორის სპეციალური ტრიბუნალის შექმნის შესახებ ორმხრივი შეთანხმების მომზადებას, შეთანხმების ხელმოწერას შემდეგ ხმა არ მისცა.

შეგახსენებთ, 26 ივნისს, უკრაინის პრეზიდენტმა ვოლოდიმირ ზელენსკიმ და ევროპის საბჭოს გენერალურმა მდივანმა, ალენ ბერსემ რუსეთის მიერ უკრაინის წინააღმდეგ აგრესიის დანაშაულის გამოსაძიებლად სპეციალური ტრიბუნალის შექმნის შესახებ შეთანხმებას ხელი მოაწერეს.

ასევე იხილეთ: უკრაინამ და ევროსაბჭომ რუსეთის დანაშაულის გამოსაძიებლად სპეციალური ტრიბუნალის შექმნას მოაწერეს ხელი