ქართული ოცნების დეპუტატმა მამუკა მდინარაძემ ჟურნალისტებთან საუბრისას გამორიცხა ის ვერსია, რომ გიორგი კვირიკაშვილის გადადგომის ერთ-ერთი მიზეზი ზაზა სარალიძის მოთხოვნა იყო.

მდინარაძემ განმარტა, რომ პრემიერის გადაწყვეტილებას კავშირი არ აქვს პარლამენტის წინ გამართულ აქციებთან და "იმ მოვლენებთან, რომლებიც, სამწუხარო სიტუაციისა და ფაქტის გამოყენებით, ნაციონალურმა მოძრაობამ აწარმოა".

"საუბარი იყო ეკონომიკურ გამოწვევებზე, მათი გადაჭრის რეალურ გზებზე. ეს გადაწყვეტილება იყო ამაზე მსჯელობის რეალური გაგრძელება", - ამბობს მამუკა მდინარაძე.

გიორგი კვირიკაშვილმა პრემიერ-მინისტრის თანამდებობა დღეს, 13 ივნისს დატოვა. კვირიკაშვილის გადადგომასთან ერთად გადაყენებულად მიიჩნევა საქართველოს მთავრობა. შესაბამისად, მათ პარლამენტმა ნდობა ხელახლა უნდა გამოუცხადოს.

ბოლო ერთი თვის განმავლობაში საქართველოში 10-მდე აქცია ჩატარდა. ყველა შემთხვევაში ისმოდა მთავრობის გადადგომის მოთხოვნა.

მანამდე გიორგი კვირიკაშვილმა განაცხადა, როგორც კი დარწმუნდება, რომ მისი გადადგომა "ქვეყანას წაადგება", თანამდებობას დატოვებს.

გაიგეთ მეტი: რა ხდება პრემიერ-მინისტრის გადადგომის შემდეგ