მოლაოღლის განვითარების ცენტრისა და ხულდარას სათემო რესურცენტრის ხელშეწყობით რამდენიმე დღის წინ მარნეულის მუნიციპალიტეტის სოფელ ხულდარაში სკოლის მოსწავლეთა ხელნაკეთი ნივთების გამოფენა გაიმართა. გამოფენაზე მარნეულის მუნიციპალიტეტის 17 სოფელში მცხოვრები 120-ზე მეტი მოსწავლის ნამუშევარი იყო წარმოდგენილი. გამოფენამ, რომელსაც ადგილობრივ მოსახლეობასთან ერთად "ფონდი ტასოს“, საქართველოში თურქეთის საელჩოს, სამოქალაქო საზოგადოებისა და ხელისუფლების წარმომადგენლებიც ესწრებოდნენ, სტუმრების დიდი მოწონება დაიმსახურა.

მოლაოღლის განვითარების ცენტრი და ხულდარას სათემო რესურსცენტრი 26 წლის ქამრან აფანდიევმა და 27 წლის არიზ დაშდემიროვმა დააფუძნეს.

თავდაპირველად მოლაოღლის განვითარების ცენტრი დაფუძნდა. ის მარნეულის მუნიციპალიტეტის სოფელ მოლაოღლის საჯარო სკოლის შენობაში ფუნქციონირებს. მოლაოღლის განვითარების ცენტრში მისვლა სოფელში მცხოვრებ ყველა ახალგაზრდას შეუძლია. აქ ისინი ცენტრის მიერ ორგანიზებულ ტრენინგებსა და სემინარებში მონაწილეობენ, მუშაობენ პროექტებზე და ცენტრის მიერ დაფუძნებულ ბიბლიოთეკაში არსებული წიგნებით უფასოდ სარგებლობენ.

მას შემდეგ, რაც მოლაოღლის განვითარების ცენტრის მიმართ ინტერესი გაიზარდა, ქამრან აფანდიევმა და არიზ დაშდემიროვმა ასეთივე ცენტრის შექმნა სხვა სოფლებშიც გადაწყვიტეს. “საქმე, რომელიც მოხალისეობით დავიწყეთ, შემდეგ პროექტად გადავაქციეთ. პროექტის განხორციელებაში "ფონდი ტასო” დაგვეხმარა. მოვაწყეთ ბიბლიოთეკა ბავშვებისთვის. აქ ისინი მათთვის საჭირო და უამრავ საინტერესო ინფორმაციას ეცნობიან. გარდა ამისა, ვუტარებთ ტრენინგებს სხვადასხვა თემებზე. სულ 25-ზე მეტ სკოლაში გვაქვს ჩატარებული ტრენინგები. ამჟამად მოსწავლეებს ვაცნობთ უმაღლეს სასწავლებლებში ჩაბარების წესებს. გვინდა, რომ მსგავსი ცენტრები სხვა სოფლებშიც შევქმნათ,” - ამბობს ქამრანი.

წიგნების და ბიბლიოთეკის მიმართ გაზრდილი ინტერესის გამო ქამრანმა, სოფელ ხულდარაში, საკუთარი სახლის ეზოში, ყოფილი ავტოფარეხის შენობაში ბავშვებისთვის ბიბლიოთეკა მოაწყო. ამ ბიბლიოთეკით სარგებლობა ახლა სოფლის ყველა მცხოვრებს შეუძლია. “გვინდა, რომ ხელი შევუწყოთ მოაზროვნე ახალგაზრდების განვითარებას. ბიბლეოთეკა რომ გაგვეკეთებინა, ბევრი ახალგაზრდა დაგვეხმარა ფინანსურად. ცენტრით ბევრი მოსწავლეა დაინტერესებული. თავდაპირველად გამოფენის მოწყობას მხოლოდ რამდენიმე სკოლის ბაზაზე ვაპირებდით. მას შემდეგა, რაც ინფორმაცია ინტერნეტით გავრცელდა, გამოფენაში მონაწილეობის სურვილი სხვა სკოლებმაც გამოთქვეს. საბოლოო ჯამში, 17 სკოლის 120-ზე მეტი მოსწავლის ნამუშევარი გამოვფინეთ.”

ხულდარაში მცხოვრები 17 წლის ვალი მეთერთმეტე კლასის მოსწავლეა. ამბობს, რომ ასეთი ბიბლიოთეკა სოფელში აქამდე არასოდეს ჰქონიათ: “ეს ბიბლიოთეკა ძალიან დიდი შესაძლებლობაა ცოდნის და განათლების მისაღებად. სოფელში მცხოვრები ყველა ბავშვი დადის აქ.”

18 წლის სარხანი სოფელ ალგეთში ცხოვრობს. ის სოფელ ხულდარაში არსებული ბიბლიოთეკით სარგებლობს და ამბობს, რომ მსგავსი ცენტრი ყველა სოფელს სჭირდება: "გამოფენისთვის ხელნაკეთი ნივთები მეც შევკრიბე. გვინდა, რომ მსგავსი ცენტრი ალგეთშიც გავხსნათ, უფრო მეტი ბავშვი დაინტერესდება მეცნიერებით და განათლებით.”

შახლა ასმაროვა 25 წლისაა. ის ბოლნისის მუნიციპალიტეტის სოფელ ძველი ქვეშის საჯარო სკოლაში ქართულ ენას ასწავლის. მისი თქმით, ძველ ქვეშში ერთადერთი ბიბლიოთეკაა, ისიც სკოლაში და იქ წიგნების მცირე არჩევანია: "არიზისა და ქამრანის დახმარებით ასეთ ცენტრს ჩვენს სოფელში ჩვენც ვაკეთებთ. ბავშვები დიდი ენთუზიაზმით მოდიან, ახალი წიგნები ყველას აინტერესებს. ძველ ქვეშში ასეთი ცენტრი და ბიბლიოთეკა აქამდე არასოდეს ყოფილა. საბედნიეროდ, წიგნების მიმართ ბავშვების ინტერესი იზრდება.”