რუსეთმა კომპანია SGS-სთან საბაჟო მონიტორინგის შესახებ ხელშეკრულებას ხელი მოაწერა. ეს შესაძლებლობას მისცემს საქართველოს ჰქონდეს ინფორმაცია აფხაზეთიდან და სამხრეთ ოსეთიდან რუსეთში გასული ტვირთების შესახებ. ანალოგიურ ხელშეკრულებას საქართველომ 2017 წლის დეკემბერში მოაწერა ხელი.

2011 წლის 9 ნოემბერს რუსეთ-საქართველოს შორის ხელი მოეწერა შეთანხმებას "საბაჟო ადმინისტრირებისა და სასაქონლო ვაჭრობის მონიტორინგის მექანიზმთან დაკავშირებული ძირითადი პრინციპების შესახებ", რომლითაც თბილისმა რუსეთს მსოფლიო სავაჭრო ორგანიზაციაში (WTO) გაწევრიანებისკენ გზა გაუხსნა.

აღნიშნული ორგანიზაცია წევრებს ავალდებულებს, რომ ერთმანეთს შორის საზღვრები და ტვირთბრუნვა უნდა იყოს გამჭვირვალე. სწორედ ამის გამო საერთაშორისო ტენდერით შეირჩა კომპანია, რომელიც სავაჭრო დერეფნებში მონიტორინგს განახორციელებდა.

რუსეთი, ოკუპირებულ სოხუმთან და ცხინვალთან ერთად, კატეგორიული წინააღმდეგი იყო, რომ SGS-ის მებაჟეებს ოკუპირებულ ტერიტორიებზე, შემავალ-გამავალი ტვირთები აღერიცხათ. თუმცა 2017 წლის თებერვლის დასაწყისში, როგორც მოსკოვმა, ისე თბილისმა აღნიშნეს, რომ 2011 წლის შეთანხმების განსახორციელებლად "პოზიტიური ძვრები" შეინიშნება.

შეთანხმების მიხედვით, ჩამოყალიბდა სამი სავაჭრო დერეფანი: ადლერი-ზუგდიდი, ჩრდილოეთ ოსეთის სოფელი ნარი-გორი და ყაზბეგი-ზემო ლარსი. ამ დერეფნებში შემავალი და გამომავალი ტვირთის მონიტორინგი კი ნეიტრალურ, კერძო, შვეიცარიულ კომპანია SGS Societe Generale de Surveillance SA-ს დაევალა, რომლის მონიტორები გორთან, ზუგდიდთან, ადლერთან და როკის გვირაბის ჩრდილოეთ მხარეს უნდა განლაგებულიყვნენ.