საერთაშორისო უფლებადაცვითი ორგანიზაცია, Amnesty International გიორგი ბაჩიაშვილის განცხადებების დამოუკიდებელი გამოძიების აუცილებლობაზე საუბრობს. ორგანიზაცია განცხადებაში აღნიშნავს, რომ გიორგი ბაჩიაშვილს ადვოკატებთან წვდომის საშუალება არ მიეცა მაშინაც კი, როცა მიღებული დაზიანებების გამო მკურნალობდა.

"ივანიშვილის ყოფილმა თანაშემწემ, გიორგი ბაჩიაშვილმა რომელიც ციხეში იმყოფება, საკანში ფიზიკური შეურაცხყოფის შესახებ განაცხადა. მას წვდომა არ მიეცა ადვოკატებთან, მათ შორის მაშინაც, როცა მიღებული დაზიანებების გამო მკურნალობდა. აუცილებელია მისი განცხადებების დაუყოვნებლივ დამოუკიდებელი გამოძიება" — აღნიშნულია Amnesty International-ის განცხადებაში, რომელიც სოციალურ ქსელ X-ზე გამოქვეყნდა.

თანაინვესტირების ფონდის ყოფილ ხელმძღვანელს გიორგი ბაჩიაშივილს გლდანის ციხეში სცემეს. ინფორმაცია თავდაპირველად NEWS.On.ge-ს მისმა ადვოკატმა, დავით ჯანდიერმა დაუდასტურა. როგორც მან განგვიცხადა, ბაჩიაშვილი ციხის სამკურნალო დაწესებულებაში იყო მოთავსებული. კლინიკა "ვივამედის" კლინიკური დირექტორის, ზურაბ ჩხაიძის განცხადებით, ბაჩიაშვილი პარასკევს, 11 ივლისს, კლინიკაში სხეულის სხვადასხვა დაზიანებით შეიყვანეს. მისი თქმით, ბაჩიაშვილს ასევე აღენიშნებოდა ღია ჭრილობები თავის არეში. ჩხაიძის ცნობით, ბაჩიაშვილი კლინიკაში გადაყვანიდან რამდენიმე საათში უკან, ციხეში დააბრუნეს.

გიორგი ბაჩიაშვილის ცემის ფაქტი უკვე დაადასტურეს შესაბამისმა უწყებებმა.