დღეს, 15 ივლისს ევროკავშირის საგარეო საქმეთა მინისტრები საქართველოს საკითხზე იმსჯელებენ. ამის შესახებ ინფორმაცია ევროპული საბჭოს ვებგვერდზეა განთავსებული.

მათი ცნობით, საბჭო განიხილავს საქართველოში არსებულ ვითარებას და განიხილავს შესაძლო ზომებს ხელისუფლების მიერ მზარდი რეპრესიების საპასუხოდ.

ევროკავშირის უმაღლესმა წარმომადგენელმა საგარეო საქმეთა და უსაფრთხოების საკითხებში კაია კალასმა "ევროსკოპს" განუცხადა, რომ "თარგეთირებული სანქციებისთვის" სიას წარადენს და მათ შორის ორი მოსამართლეა.

"წარვადგენ სიას "თარგეთირებული სანქციებისთვის" მათ შორის ორი მოსამართლეა. ყველა ინსტრუმენტი მაგიდაზეა, ვეცდებით მივაღწიოთ კონსენსუსს ამ საკითზე. ქართულ ოცნებას გავუგზავნით წერილს უვიზო მიმოვლის შეჩერებაზე, სადაც კონკრეტული მოთხოვნებია და ამისთვის კონკრეტული ვადაა მითითებული", — განაცხადა კალასმა.

რადიო თავისუფლებამ მოიპოვა დოკუმენტი, რომელიც საგარეო ქმედებათა სამსახურმა (EEAS) წევრი ქვეყნების დელეგაციებს გაუგზავნა.

მათი ცნობით, ევროკომისარი საშინაო და მიგრაციის საქმეებში, მაგნუს ბრუნერი 15 ივლისის სხდომამდე წერილს გააგზავნის საქართველოს მთავრობასთან ქვეყნისთვის სავიზო ლიბერალიზაციის შეჩერების მუქარით, თუკი საქართველოს მთავრობა შესაბამის ნაბიჯებს არ გადადგამს ქვეყნის ევროპული კურსის დასაბრუნებლად.

ევროკავშირის მინისტრების 15 ივლისის შეხვედრისთვის საქართველოსთან დაკავშირებით მომზადებულ დოკუმენტში — სამომავლო ნაბიჯებს შორის კვლავ მოხსენიებულია როგორც ქვეყანაში შესვლის აკრძალვა და უვიზო მიმოსვლის გაუქმება ცალკეული ადამიანებისთვის, ასევე — მთელი საქართველოსთვის.

23 ივნისს ევროკავშირის წევრი ქვეყნების საგარეო საქმეთა მინისტრების შეხვედრაზე, კვლავ ვერ მიაღწიეს კონსენსუსს ქართული ოცნების ლიდერების სანქცირებაზე. თუმცა გაჩნდა მოლოდინი, რომ შესაძლოა, 15 ივლისს მიაღწიონ შეთანხმებას მოსამართლეთა სანქცირებაზე, — წერს რადიო თავისუფლება.

"საქართველოს მთავრობის მოქმედების კურსის გათვალისწინებით, რომელიც ეწინააღმდეგება ევროკავშირის დამფუძნებელ ღირებულებებსა და პრინციპებს, საქართველოს გაწევრიანების პროცესი ფაქტობრივად შეჩერდა 2024 წელს. 2024 წლის განმავლობაში ევროკავშირის ლიდერებმა არაერთხელ განიხილეს საქართველოში არსებული ვითარება, კერძოდ, ევროპის საბჭოს ივნისს, ოქტომბერსა და დეკემბერში გამართულ შეხვედრებზე. ამ მიზნით, ევროკავშირის ლიდერებმა გამოთქვეს სერიოზული შეშფოთება საქართველოში განვითარებული მოვლენების გამო, მკაცრად დაგმეს მშვიდობიანი მომიტინგეების, პოლიტიკოსებისა და მედიის წარმომადგენლების მიმართ ძალადობა და გამოთქვეს სინანული საქართველოს მთავრობის მიერ ქვეყნის ევროკავშირში გაწევრიანების პროცესის 2028 წლამდე შეჩერების გადაწყვეტილების გამო.

ევროკავშირი მზადაა მხარი დაუჭიროს ქართველი ხალხის ევროპულ მისწრაფებებს და ქვეყნის გაწევრიანების გზას, თუ საქართველოს ხელისუფლება გადაწყვეტს მოქმედების ამჟამინდელი კურსის შეცვლას" — ნათქვამია ევროპული საბჭოს ვებგვერდზე განთავსებულ ინფორმაციაში.