საჯარო მოსამსახურეთა დამოუკიდებელი პროფესიული კავშირი "კონსტიტუციის 78-ე მუხლი" ვაგზლის მოედანზე მომხდარ ტრაგედიასთან დაკავშირებით განცხადებას ავრცელებს. ორგანიზაციის განცხადებით, მიუხედავად იმისა, რომ თბილისის მერიას ჰქონდა ინფორმაცია შენობის ავარიულობის შესახებ, მათ მაინც დართეს უფლება გარე მოვაჭრეებს ევაჭრათ ამ ტერიტორიაზე და შენობის წინ საპარკინგე სივრცეც მოაწყო.

"როგორც კახა კალაძის განცხადებიდან ირკვევა, მერიისა და საკრებულოს შესაბამისი სამსახურები ინფორმირებულნი იყვნენ შენობის იმ ხარისხის ავარიულობაზე, რომ ის საჭიროებდა დემონტაჟს. ამ ფონზე, თბილისის მერიამ, მაგალითად, 2024 წლის 27 მაისსა და 2025 წლის 16 აპრილს გასცა სავაჭრო ობიექტებისთვის სარეკლამო აბრების მოწყობის ნებართვები, რომელიც თბილისის მერიის არქიტექტურის სამსახურის ვებგვერდზე tas.ge საჯაროდ იძებნება (AR11033208 და AR11084015). ამავე შენობის წინ თბილისის მერიის მიერვე მოწყობილია ზონალურ — საათობრივი პარკირება.

ჩნდება კითხვა, რას ელოდა თბილისის მერია? ზემოაღნიშნული ნებართვებით რატომ მისცა ავარიულ შენობაში სავაჭრო ობიექტებს ფუნქციონირების შესაძლებლობა და რატომ არ შეზღუდა შენობის გარეთ გარე ვაჭრობა? რატომ მოაწყო შენობის წინ საპარკინგე სივრცე და სახლის ჩანაცვლებაზე თუნდაც უარის თქმის მიუხედავად, რატომ არ უზრუნველყო როგორც ადგილობრივი მცხოვრებლების, ისე შენობის მიმდებარედ გამვლელი ადამიანების სიცოცხლისა და ჯანმრთელობის დაცვა?" — ვკითხულობთ განცხადებაში.

განცხადებაში ასევე ვკითხულობთ, რომ "ავარიული მრავალბინიანი კორპუსების ჩანაცვლებისთვის სავალდებულო თანხმობის ნაწილში ცვლილებები უკვე ორ წელზე მეტია, შესულია" და 100% თანხმობა არ არის საჭირო.

"მიუხედავად იმისა, რომ თბილისის მუნიციპალიტეტის მერია და დიდუბის გამგეობა ინფორმირებული იყო აღნიშნული შენობის ავარიულობის შესახებ, მეტიც — დადგენილი ჰქონდა ავარიულობის ხარისხი, კახა კალაძე დღეს ებღაუჭება ერთადერთ არგუმენტს, რომ შენობის ჩანაცვლებაზე მესაკუთრეთა 100%-იანი თანხმობა არ იყო, თუმცა როგორც თბილისის საკრებულოს 2023 წლის 27 იანვრის №21-1 დადგენილებით ირკვევა, ავარიული მრავალბინიანი კორპუსების ჩანაცვლებისთვის სავალდებულო თანხმობის ნაწილში ცვლილებები უკვე ორ წელზე მეტია, შესულია," — ვკითხულობთ განცხადებაში.

ცნობისთვის, კახა კალაძემ მედიას განუცხადა, რომ ვაგზლის მოედანზე შენობის ფასადის ჩამონგრევა უბედური შემთხვევა იყო და მოსახლეობას შენობის ავარიულობაზე ინფორმაცია ჰქონდათ. კალაძემ დასძინა, რომ შენობის მცხოვრებლებს ნაწილმა უარი განაცხადა "ჩანაცვლების პროგრამაში" მონაწილეობაში და ამის გამო ვერ აიცილეს ტრაგედია თავიდან.

15 ივლისს, სადგურის მოედანზე საცხოვრებელი კორპუსის ფასადი ჩამოინგრა. მომხდარს მსხვერპლი მოჰყვა. თავდაპირველად შსს-მ ერთი ადამიანის დაღუპვა დაადასტურა, მოგვიანებით კი გაავრცელა ცნობა მეორე გარდაცვლილის შესახებ. უწყების ცნობითვე, დაშავებულია კიდევ ერთი ადამიანი, რომელიც სტაციონარშია გადაყვანილი. ნგრევის ფაქტზე გამოძიება სისხლის სამართლის კოდექსის 240-ე მუხლით დაიწყო.