გაფრთხილება: სტატია შეიცავს სპოილერებს Emily in Paris-ის მეოთხე სეზონიდან

მოემზადეთ, ჩვენი საყვარელი ამერიკელის ევროპული ვოიაჟი გრძელდება, ემილიმ, ამჯერად, ვენეციაში გადაინაცვლა. სულ ახლახან ნეტფლიქსმა გაგვანდო, რომ სერიალის გადაღებები ოფიციალურად დაწყებულია და მეხუთე სეზონს ძალიან მალე ვიხილავთ.

სერიალი მოგვითხრობს ემილი კუპერის, ჩიკაგოელი მოდის ექსპერტის, შესახებ, რომელიც მოულოდნელად პარიზში გადადის სამუშაოდ. Emily in Paris-მა, წლების განმავლობაში, გულშემატკივრებისგან დადებითი გამოხმაურება მოაგროვა. სერიალის მეოთხე სეზონმა ნეტფლიქსის გლობალურ ტოპ 10-ში პირველი ადგილი დაიკავა და გამოსვლიდან პირველი ოთხი დღის განმავლობაში, თითქმის 20 მილიონი ნახვა დააგროვა.

შოუს ახალი სეზონი ნეტფლიქსმა ჯერ კიდევ 2024 წელს დააანონსა, მეოთხე სეზონის მეორე ნაწილის გამოსვლიდან სულ რაღაც 4 დღეში. ლილი კოლინზმა სიახლე დილა მშვიდობისა, ამერიკა-ს დილის გადაცემაში გაგვაცნო, მოგვიანებით, ინფორმაცია ნეტფლიქსმა ინსტაგრამზე გამოაქვეყნა.

როგორ დასრულდა მეოთხე სეზონი?

სერიალის მეოთხე სეზონმა მაყურებლებში დიდი ორაზროვნება გამოიწვია და ძალიან ბევრი საკითხი კითხვის ნიშნის ქვეშ დატოვა. გაბრიელთან და ალფისთან ურთიერთობის დასრულების შემდეგ, ემილი რომში აღმოჩნდება, სადაც ის ახალ ურთიერთობას მარჩელოსთან, უმბერტო მურატორის მემკვიდრესთან, იწყებს.

ემილის პროფესიულ კარიერაშიც საინტერესო სიახლეა, ვინაიდან მოდის ექსპერტი უმბერტო მურატორისთან ექვსთვიან კონტრაქტს აფორმებს და იძულებული ხდება, რომ რომში გადავიდეს საცხოვრებლად. ემილი მზადაა ახალი გამოწვევისთვის და იგი ცხოვრების ახალ ეტაპს იტალიაში იწყებს.

თუმცა, ყველაფერი ამით არ მთავრდება. მიუხედავად იმისა, რომ ემილის ახალი ცხოვრება რომში დაიწყო, სერიალის მთავარი სასიყვარულო სამკუთხედი კვლავ აქტუალურია. გაბრიელი აანალიზებს, რომ ემილის მიმართ გრძნობები ისევ აქვს და ალფის წახალისებით, გადაწყვეტს, რომ რომში ემილის გაჰყვეს.

ეს ყველაფერი ემილის ახალ რომანსა და მის წარსულს შორის პირდაპირ დაპირისპირებას იწვევს, რაც მაყურებელს კითხვას უჩენს — გაგრძელდება მისი ურთიერთობა მარჩელოსთან?

დაიწყო თუ არა ახალი სეზონის გადაღებები?

სერიალის შემქმნელების პასუხია — დიახ.

ნეტფლიქსის ცნობით, Emily in Paris-ის გადაღებები 2025 წლის 7 მაისს დაიწყო, ხოლო სერიალის პროდიუსერებმა გადასაღები მოედნიდან ფოტოებიც შემოგვთავაზეს, სადაც ემილის, თავის განუყრელ მეგობარ, ვესპასთან ერთად ვხედავთ.

ნეტფლიქსმა ასევე გამოაქვეყნა ვიდეო, სადაც ეუჯენიო ფრანჩესკის, მარჩელოს როლის შემსრულებელს ვხედავთ. როგორც ამბობენ, დუეტი კადრებს იტალიის დედაქალაქის ლეგენდარულ Fendi-ს მაღაზიაში იღებდა.

განხილვის საკითხი გახდა, როცა გაირკვა, მე-5 სეზონის გადაღებები პარიზის ნაცვლად რომში მიმდინარეობდა და, როგორც აღმოჩნდა, სერიალის გადაღებები მესამე ლოკაციაზე, ვენეციაში, გაგრძელდება. ინფორმაციას ვენეტოს რეგიონის გუბერნატორი, ლუკა ზაია ადასტურებს.

"ეს არაჩვეულებრივი ამბავია, ვხედავთ, რამდენად მიმზიდველი ხდება ჩვენი რეგიონი გლობალური აუდიოვიზუალური წარმოებებისთვის", — განაცხადა ზაიამ იტალიურ პრესასთან გაკეთებულ განცხადებაში.

მან დასძინა, რომ რეჟისორი ენდრიუ ფლემინგი ამჟამად ადგილებს არჩევს ჩრდილოეთ იტალიის რეგიონის ვენეტოს კინოკომისიისა და ვენეციაში დაფუძნებული კომპანია 360 Degrees Film-ის დახმარებით.

ვენეციაში სერიალის გადაღებები, სავარაუდოდ, 5 აგვისტოს დაიწყება.

რას უნდა ველოდოთ ახალ სეზონში?

სერიალის მეოთხე სეზონი დასრულდა იმით, რომ სილვიმ ემილის სთხოვა სააგენტო გრატოს რომის ახალი ოფისისთვის ეხელმძღვანელა; მინდი შანხაიში მიემგზავრებოდა, რათა "ჩინური პოპვარსკვლავის" ჟიურის წევრი გამხდარიყო, ხოლო გაბრიელი რომისკენ მიიწევდა, რათა "მსოფლიოში საუკეთესო გოგო" დაებრუნებინა, თუმცა ეს ადვილი ნამდვილად არ იქნება, რადგან ეს გოგო უკვე ახალ რომანშია გახვეული მარჩელოსთან და იტალიაში ახალი ცხოვრების დაწყებას გეგმავს.

სერიალის შემქმნელი, დარენ სტარი, ეთანხმება იმ აზრს, რომ გაბრიელსა და ემილის შორის "ნამდვილი ნაპერწკალია". მისი თქმით, გაბრიელს რთული გზა ელის.

"ვგრძნობ, რომ მათ აქვთ ნამდვილი რომანტიკული კავშირი და ეს ყველაფერი მომავალ სეზონშიც გაგრძელდება", — თქვა მან ნეტფლიქსის ბლოგში.

რომელი მსახიობების დაბრუნებას უნდა ველოდოთ მეხუთე სეზონში?

თავდაპირველად, მოსალოდნელი იყო, რომ მეოთხე სეზონში მონაწილე მსახიობების უმეტესობა ახალ სეზონში დაბრუნდებოდა, მათ შორის იყვნენ — მთავარი როლის შემსრულებელი ლილი კოლინზი, ეშლი პარკი (მინდის როლის შემსრულებელი), ლუკას ბრავო (გაბრიელი), ფილიპინელ ლეროი-ბოლიე (სილვი) და კამილ რაზატი (კამილი).

თუმცა, 2025 წლის 23 აპრილს, რაზატმა ინსტაგრამზე გულისამაჩუყებელი პოსტი გამოაქვეყნა, სადაც მან განაცხადა, რომ ის სერიალს ტოვებდა.

"მივიღე გადაწყვეტილება, Emily in Paris-ს ჩამოვშორდე", — დაწერა რაზატმა ინსტაგრამის პოსტში — "ეს ნამდვილად შესანიშნავი გამოცდილება იყო, დაუვიწყარი მოგონებებით".

მიუხედავად იმისა, რომ ეს ამბავი ნამდვილად გულდასაწყვეტია, ნუგეშისმომგვრელია იმის ცოდნა, რომ, სავარაუდოდ, კვლავ დაბრუნდებიან მსახიობები — ლუსიენ ლავისკონტი (ალფი), თალია ბესონი (ჟენევიევა), სამუელ არნოლდი (ჯულიანი) და ბრუნო გუერი (ლუკი).

Emily in Paris-ის გულშემატკივრებს ისღა დაგვრჩენია, გასულ სეზონებს კიდევ ერთხელ ბეჯითად გადავავლოთ თვალი და მოთმინებით დაველოდოთ მეხუთე სეზონს, რომლის გამოსვლის თარიღი, ჯერჯერჯობით უცნობია.