ცხოვრების ღირებულების ინდექსით, პოსტსაბჭოთა 15 ქვეყანას შორის, თბილისი მეექვსე ყველაზე იაფიანი ქალაქია. ამის შესახებ გამოცემა The Financial წერს.

გამოცემის ცნობით, თბილისში ცხოვრების ღირებულება ნიუ-იორკთან შედარებით 67,99%-ით ნაკლებია. აღნიშნული მონაცემების შედარება ონლაინ მონაცემთა ბაზის, numbeo.com-ს მეშვეობით ხდება. Numbeo-ს შემფასებელი სისტემა ერთი ადამიანისა (921 ლარი) და 4 წევრიანი ოჯახის (3 296 ლარი) თვიურ ხარჯებს აფასებს.

სტატიის ავტორმა, მადონა გასანოვამ, ერთმანეთს შეადარა პოსტსაბჭოთა ქვეყნების ცხოვრების დონის ინდექსი ნიუ-იორკის 100%-იან მაჩვენებელს. ინდექსი სამომხმარებლო საქონლის ფასების შედარებითი ინდიკატორია, რაც სურსათს, რესტორნებს, ტრანსპორტსა და კომუნალურ გადასახადებს მოიცავს. ავტორი განმარტავს, რომ ცხოვრების ღირებულების ინდექსი არ გულისხმობს საცხოვრებელის ხარჯებს, ისეთს, როგორიცაა ბინის დაქირავება, ან იპოთეკა.

Numbeo-ს მიხედვით, პროსტაბჭოთა ქვეყნებს შორის ყველაზე ძვირიან ქალაქებს შორის, ესტონეთის დედაქალაქი დასახელდა, კიშინიოვი კი ყველაზე იაფიან ქალაქად. თბილისმა სიძვირის მიხედვით მე-10, სიიაფის მიხედვით კი, მე-6 ადგილი დაიკავა:

  1. ტალინი
  2. რიგა
  3. ვილნიუსი
  4. აშხაბადი
  5. მოსკოვი
  6. ტაშკენტი
  7. მინსკი
  8. ერევანი
  9. ბიშკეკი
  10. თბილისი
  11. დუშანბე
  12. ბაქო
  13. ასტანა
  14. კიევი
  15. კიშინიოვი.

The Financial ცალკე გამოყოფს პოსტსაბჭოთა ქვეყნების რეიტინგს საცხოვრებელი ხარჯებისა და სარესტორნო მომსახურეობის სიძვირის მიხედვით.

Numbeo-ს რეიტნიგში თბილისი მეორე ადგილზეა იმ ქვეყნებს შორის, სადაც ყველაზე იაფად (ქალაქის ცენტრში 755 ლარი და პერიფერიებში 422 ლარი) შეიძლება ბინის თვიურად დაქირავება. პირველ ადგილს კიშინიოვი იკავებს, სადაც ცენტრში ბინის დაქირავების თვიური ღირებულება $227-ია. სიიაფის მიხედვით, მესამე და მეოთხე ადგილზე კი ბაქო და ერევანია.

სტატიის ავტორი წერს, რომ თბილისში, იაფფასიან რესტორანში, ერთი ულუფისთვის სტუმარმა შეიძლება 15 ლარი ($6,4) დახარჯოს, ხოლო საშუალო დონის რესტორანში, ორი ულუფისთვის საჭირო იქნება საშუალოდ 45 ლარი ($20).

აღნიშნული მაჩვენებლებისა და სხვა ქალაქების მდგომარეობის შედარებით, საქართველო მეშვიდე ადგილზეა რესტორნების სიიაფით.

მონაცემების მიხედვით, დუშანბეში და კიშინიოვში ყველაზე იაფია სარესტორნო მომსახურეობა. ამ მხრივ, თბილისის შემდეგ ყველაზე ძვირია, ასტანა, ბაქო, მინსკი, ვილნიუსი, რიგა, მოსკოვი, აშხაბადი და ტალინი.