ევროკომისარი იოჰანეს ჰანი რუსთავი 2-ის საქმეს ეხმაურება. მედიასთან საუბრისას, მან განაცხადა რომ საპარლამენტო არჩევნები უნდა ჩატარდეს გამჭვირვალედ, გამოხატვის თავისუფლების დაცვით:

"რამდენადაც ჩემთვის ცნობილია, რუსთავი 2-ის საქმე სასამართლოში განიხილება და სასამართლომ უნდა მიიღოს გადაწყვეტილება. წინ არის საპარლამენტო არჩევნები და მნიშვნელოვანია, რომ ის მომზადდეს და ჩატარდეს სამართლიანად და გამჭვირვალედ, საერთაშორისო სტანდარტების შესაბამისად, თავისუფალი მედიისა და გამოხატვის თავისუფლების დაცვის ჩათვლით. სწორედ ამ კუთხით დავაკვირდებით ყველაფერს"

ევროპული სამეზობლო პოლიტიკისა და გაფართოებაზე მოლაპარაკებების საკითხებში ევროკომისარი იოჰანეს ჰანი, ბათუმში, რიგით მე-13 კონფერენციაზე - საქართველოს ევროპული გზა - სტაბილურობა, განვითარება, მრავალფეროვნება - სიტყვით გამოვიდა. მან ასევე, საქართველოს სავიზო ლიბერალიზაციის შესახებაც ისაუბრა. ევროკომისარი "თითქმის დარწმუნებულია", რომ საქართველოს მოქალაქეები ოქტომბერში შეძლებენ ევროპის ქვეყნებში უვიზოდ მოგზაურობას.

იოჰანეს ჰანი ტვიტერზე წერს, რომ მიუხედავად ევროპაში არსებული რთული პერიოდისა, საქართველოს ევროპული გზისადმი მხარდაჭერის ინტენსუვობა არ შეცვლილა.