ილუსტრატორი ქენდის ჯინ ანდერსენი საბავშვო წიგნისთვის ინფორმაციის მოძიების პროცესში იყო ჩაფლული, როცა იდუმალ ამბავს გადააწყდა.

ძველ სტატიაში ქენდისმა მეცნიერების ფოტო იპოვა, რომელიც ვირჯინიაში, 1971 წელს გამართულ საერთაშორისო კონფერენციაზე იყო გადაღებული.

თითქმის ნახევარი საუკუნის წინ გადაღებულ ფოტოზე, 37 კაცს შორის ერთადერთი ქალი იყო და მისი სახეც ნახევრად წინ მდგომ კაცს ჰქონდა დაფარული.

სტატიაში ყველა კაცის სახელი ეწერა, აფრო-ამერიკელი ქალი კი სიაში "არაიდენტიფიცირებულად" იყო განთავსებული.

როგორც ანდერსენმა CNN-ს უთხრა, მას სულ გადაავიწყდა საქმე და დღეების განმავლობაში ფოტოზე ნანახი ქალის ვინაობის გარკვევას ცდილობდა:

"რადგან უცნობი ქალი მეცნიერი იმ კონფერენციაზე იყო, ე.ი. ის მნიშვნელოვანი ფიგურა იყო. ვგრძნობდი, რომ მისი ვინაობა აუცილებლად უნდა გამეგო".

ქენდისმა ფოტო ტვიტერზე გამოაქვეყნა:

"ასეთი მისია მაქვს: ქალი ამ ფოტოზე 1971 წელს საერთაშორისო კონფერენციას დაესწრო. ის 38 მეცნიერში ერთადერთი ქალია და ასევე ერთადერთია, რომელიც იდენტიფიცირებული არაა, მაშინ როცა, ყველა კაცის სახელია ცნობილი. შეგიძლიათ მისი ვინაობის გარკვევაში დამეხმაროთ?"

ანდერსენს ტვიტერზე ბევრი ფოლოუერი არ ჰყავდა და დიდი მოლოდინებიც არ ჰქონდა, თუმცა რამდენიმე დღეში, მის მისიაში ადამიანები მსოფლიოს სხვადასხვა კუთხიდან ჩაერთვნენ.

სოციალური მედიის "დეტექტივებმა" რამდენიმე დღეში გაარკვიეს, რომ უცნობი ქალი შეილა მაინორ ჰაფი იყო. ფოტოს გადაღების პერიოდში, ის ბიოლოგიური ნარჩენების ანალიტიკოსი იყო კომპანია Fish and Wildlife Service-ში.

ჰაფს, როგორც მეცნიერს, 35-წლიანი კარიერა ჰქონდა ფედერალურ მთავრობაში და მხოლოდ 12 წლის წინ გავიდა პენსიაზე, როგორც ერთ-ერთი პროფესიონალი და გარემოს დაცვის სპეციალისტი.

ანდერსენმა ჰაფი ფეისბუქზე იპოვა და მოგვიანებით მას ტელეფონით ერთ საათზე მეტხანს ესაუბრა.

"ის ძალიან თბილი, კეთილი და პოზიტიური ქალი აღმოჩნდა", - ამბობს ილუსტრატორი.

როგორც აღმოჩნდა, მეცნიერს მის შესახებ გამოცხადებულ ძებნაზე წარმოდგენაც კი არ ჰქონდა, სანამ ამაზე ანდერსენმა არ უამბო.

ჰაფის თქმით, ის არასდროს განიცდიდა, რომ იდენტიფიცირებული და ცნობილი არ იყო, რადგან ის თავის საქმეს ინტერესის გამო აკეთებდა.

"არაა პრობლემა, როცა არ გაღიარებენ. როცა შინაგანად იცი, ვინ ხარ და რას აკეთებ, სხვა რამეებს ნაკლებ მნიშვნელობას ანიჭებ", - ამბობს მეცნიერი და დასძენს, რომ მის მიმართ გამოხატული ყურადღება სასიამოვნო იყო: "მეგობრები მეუბნებოდნენ, რომ მსოფლიოს ჩემს შესახებ გასაგებად დრო სჭირდებოდა".

რაც შეეხება ანდერსენს, ის ამბობს, რომ უცნობი ქალის ძებნით, ინტერნეტის დახმარებითა და შემდეგ მასთან საუბრით იმდენად შთაგონებულია, რომ ამ ამბავზე, ან შეილას მიღწევებზე, წიგნის დაწერას გეგმავს.