ბრიტანულმა პოლიციამ ნივთიერება ნოვიჩოკი, რომლითაც ყოფილი რუსი ჯაშუში და მისი შვილი მოწამლეს, მათი სახლის შესასვლელ კარზე აღმოაჩინა.

სკოტლანდ იარდი მიიჩნევს, რომ მომწამვლელ ნივთიერებასთან პირველი კონტაქტი სწორედ აქ იყო. ყველაზე დიდი კონცენტრაცია კარის სახელურზე აღმოაჩინეს.

პოლიციის განმარტებით, ნივთიერების კვალი ქალაქ სოლსბერიში სხვადასხვა ადგილას აღმოაჩინეს, თუმცა იმ რაოდენობით არა, როგორც სკრიპალების სახლში.

ყოფილი რუსი ჯაშუში და მისი შვილი, იულია დიდ ბრიტანეთში, ქალაქ სოლსბერიში 4 მარტს ნერვო-პარალეპტიკური ნივთიერებით მოწამლეს. ისინი ამ დრომდე მძიმე მდგომარეობით საავადმყოფოში არიან.

ბრიტანეთის პრემიერ-მინისტრმა, ტერეზა მეიმ მკვლელობის მცდელობაში რუსეთის მხარე დაადანაშაულა. პრემიერმა ქვეყნიდან 23 რუსი დიპლომატი გააძევა და რუსეთს ეკონომიკური სანქციები დაუწესა.

ბრიტანეთის მხარდასაჭერად 130-ზე მეტი რუსი დიპლომატი აშშ-დან, კანადიდან და ევროპის ქვეყნებიდან გააძევეს. რუსული მისიის დიპლომატების რიცხვი შეამცირა ნატომაც. სკრიპალის სკანდალის გამო რუსეთიდან დროებით გაიწვია თავისი ელჩი ევროკავშირმაც.

რუსეთი ბრალდებებს უარყოფს და ამბობს, რომ ამ დრომდე სკრიპალების საქმის დეტალებს არ იცნობს და ლონდონს ცილისმწამებლური პოზიცია აქვ. მოსკოვმა ლონდონის ნაბიჯების საპასუხოდ, ქვეყნიდან 23 ბრიტანელი დიპლომატი გააძევა.

გაიგეთ მეტი: