რუსეთის საგარეო საქმეთა სამინისტრომ მოსკოვში დიდი ბრიტანეთის საელჩოს 23 თანამშრომელი "პერსონა ნონ-გრატად" გამოაცხადა და მოითხოვა, რომ მათ ერთი კვირაში დატოვონ ქვეყანა.

BBC-ს ცნობით, რუსეთში დაიხურება ბრიტანეთის საბჭო, რაც აქამდე სახელმწიფოებს შორის კულტურული ურთიერთობების განვითარებას უზრუნველყოფდა.

აღნიშნული გადაწყვეტილება გამომდინარეობს იქედან, რომ მანამდე, 14 მარტს დიდი ბრიტანეთის პრემიერ-მინისტრმა, ტერეზა მეიმ განაცხადა, 23 რუსი დიპლომატის გაძევებაზე. მათაც ერთი კვირა ჰქონდათ ქვეყნის დასატოვებლად.

გადაწყვეტილება მას შემდეგ მიიღეს, რაც ოფიციალურმა მოსკოვმა უპასუხოდ დატოვა ლონდონის ულტიმატუმი.

ტერეზა მეიმ 12 მარტს, განაცხადა, რომ ბრიტანეთი 24 საათის განმავლობაში დაელოდებოდა მოსკოვის ოფიციალურ ახსნა-განმარტებას თუ როგორ მოხვდა ბრიტანეთის ტერიტორიაზე, რუსეთში დამზადებული ნერვო-პარალეპტიკური გაზი სახელწოდებით ნოვიჩოკი, რითიც იქნა მოწამლული სკრიპალი და მისი შვილი.

რუსეთის საგარეო საქმეთა მინისტრმა, სერგეი ლავროვმა 15 მარტს დილით განაცხადა, რომ ოფიციალური მოთხოვნის მიღებიდან, მოსკოვი 10 სამუშაო დღის განმავლობაში ლონდონს ოფიციალურ პასუხს გადაუგზავნიდა.