კობახიძის თქმით, როდესაც ექსპრემიერმა "იცის, რამხელა უსამართლობა იყო ევროპული ბიუროკრატიის მხრიდან და მაშინდელი ამერიკული ბიუროკრატიის მხრიდან და მაინც ცდილობს, რომ აქცენტები სხვაგან გადაიტანოს, ეს არის "ნაცობა". ამ განცხადებით მან უპასუხა ჟურნალისტის კითხვას, ამოიკითხა თუ არა პერსონალური როლი ირაკლი ღარიბაშვილის წერილის იმ ნაწილში, სადაც ექსპრემიერი საქართველოს იზოლაციაში მოქცევაზე საუბრობს.

"ძალიან კარგად იცის მან, საიდან დაიწყო ეს პრობლემები. რამხელა უსამართლობა იყო 2022 წელს, ვინ იყო პრემიერი? 23 წელს რამხელა უსამართლობა იყო? ვინ იყო მაშინ პრემიერი? მაშინ წამოვიდა მთელი უსამართლობა 2022 წელს, ხოდა მაგას გეუბნებით, როცა იცის რამხელა უსამართლობა იყო ევროპული ბიუროკრატიის მხრიდან და მაშინდელი ამერიკული ბიუროკრატიის მხრიდან და მაინც ცდილობს, რომ აქცენტები სხვაგან გადაიტანოს, ეს არის "ნაცობა", — განაცხადა კობახიძემ.

ჟურნალისტის კითხვაზე "ნაცია" ექსპრემიერი? კობახიძემ განაცხადა, რომ "ნაცობა არავითარ შემთხვევაში არ ნიშნავს პარტიულ კუთვნილებას", მისთვის კორუფცია და ყველანაირი მანკიერი მოვლენა "ნაცობაა".

"ნაცობა არავითარ შემთხვევაში არ ნიშნავს პარტიულ კუთვნილებას. პარტიულ კუთვნილებას არ ნიშნავს მაინცდამაინც ნაცობა. ანუ, ნაცური აზროვნება შეიძლება დაკავშირებული იყოს პარტიულ კუთვნილებასთანაც და შეიძლება არ იყოს დაკავშირებული პარტიულ კუთვნილებასთან. კორუფციაც ჩემთვის არის ნაცობა, არასწორი ინტერპრეტაციებით საუბარიც არის ნაცობა, ანუ ყველაფერი ასეთი მანკიერი მოვლენა არის ჩემთვის ნაცობა", — თქვა კობახიძემ.