გაეროში რუსეთის მუდმივმა წარმომადგენელმა ვასილი ნებეზნიანმა განაცხადა, რომ სოლსბერგში ყოფილი რუსი ჯაშუშისა და მისი შვილის, იულიას წინააღმდეგ გამოყენებული მომწამვლელი ნივთიერის ეერთ-ერთი სავარაუდო წყარო დიდი ბრიტანეთია. ამის შესახებ მან გაეროს უშიშროების საბჭოს სხდომაზე განაცხადა.

მისი თქმით, ნოვიჩოკის სახელით ცნობილი ნივთიერების წარმოება რუსეთში არ ყოფილა. ნებეზნიანმა სკრიპალის მოწამვლა რუსეთისთვის არახელსაყრელი უწოდა და სოლსბერგში განვითარებულ მოვლენებს საპრეზიდენტო არჩევნებისთვის და მსოფლიო ჩემპიონატისთვის შექმნილი პროვოკაცია უწოდა. მან აღნიშნა, რომ რუსეთმა ბრიტანეთს გამოყენებული ნივთიერების ნიმუშები მოსთხოვა, თუმცა უარი მიიღო.

გაეროში დიდი ბრიტანეთის მუდმივი წარმომადგენლის მოადგილემ, ჯონათან ალენმა განმარტა, რომ დიდი ბრიტანეთი ვალდებული არაა ნიმუშები გააგზავნოს. მან რუსეთი ქიმიური იარაღის შესახებ კონვენციის დარღვევაში დაადანაშაულა.

"რუსეთს ოპონენტების მკვლელობის დიდხნიანი ისტორია აქვს, მათ შორის ლიტვინენკოსი, რომელიც ჩვენს ტერიტორიაზე ათი წლის წინ რადიოაქტიური ნივთიერებით მოკლეს. რუსეთი სხვა ქვეყნების შიდა საქმეებში დიდი ხანია ერევა, მათ შორის, მონტენეგროში გადატრიალების წარუმატებელი მცდელობა, სხვა სახელმწიფოებზე მუდმივი კიბერშეტევები ან დემოკრატიულ პროცესებზე გავლენის მცდელობები. რუსეთს საერთაშორისო სამართლის დარღვევის დიდი ისტორია აქვს, ყველაზე თვალსაჩინო მაგალითებს ჩვენ ვხედავთ ყირიმსა და საქართველოში", - განაცხადა ჯონათან ალენმა.

ამავე სხდომაზე გაეროში აშშ-ის მუდმივმა წარმომადგენელმა ნიკი ჰეილიმ განაცხადა, რომ აშშ დიდ ბრიტანეთს სოლიდარობას უცხადებს და სკრიპალის მკვლელობის მცდელობისთვის პასუხისმგებლობა რუსეთს ეკისრება.

"რუსეთმა ადრე დაიჩივლა, რომ ჩვენ მას ძალიან ხშირად ვაკრიტიკებთ. თუ რუსეთის მთავრობა ოპონენტების მოსაკლავად ქიმიური იარაღის გამოყენებას შეწყვეტს, თუ ის შეწყვეტს სირიელი მოკავშირისთვის ქიმიური იარაღის მიწოდებას და ქიმიური იარაღის აკრძალვისთვის გაეროსთან თანამშრომლობას დაიწყებს და ამ ნერვო-პარალეპტიკური ნივითიერების შესახებ სრულ ინფორმაციას მიაწოდებს, ჩვენ შევწყვეტთ მასზე საუბარს", - განაცხადა ჰეილიმ.

მან აღნიშნა, რომ თუ სოლსბერგში განვითარებულ მოვლენებს სათანადო რეაგირება არ მოჰყვება, ეს არ იქნება უკანასკნელი ადგილი, სადაც რუსეთი იმოქმედებს.

"ის შეიძლება გამოიყენონ აქ, ნიუ-იორკში, ან ნებისმიერი იმ ქვეყნის ქალაქში, რომელიც ამ საბჭოს წევრია. ეს გადამწყვეტი მომენტია. გაეროს წევრმა ქვეყნებმა ქიმიური იარაღის გამოყენების წინააღმდეგ გამოდიან. ახლა ერთ-ერთ ქვეყანას სუვერენული ქვეყნის ტერიტორიაზე ქიმიური იარაღის გამოყენებაში ედება ბრალი. თუ ჩვენ რუსეთს პასუხისმგებლობისკენ არ მოვუწოდებთ, [უშიშროების] საბჭოს ავტორიტეტი მთლიანად შეირყევა".

გაიგეთ მეტი: