ფეისბუქისა და Cambridge Analytica-ს სკანდალის შემდეგ, გამომგონებელმა ილონ მასკმა თავისი, SpaceX-ისა და Tesla-ს ფეისბუქ გვერდები წაშალა. მან ეს გადაწყვეტილება ტვიტერზე მიღებული წერილების შემდეგ მიიღო, რომელშიც მას სთხოვდნენ, რომ #deletefacebook კამპანიისთვის მხარი დაეჭირა.

კამპანია #deletefacebook-ი Whatsapp-ის დამფუძნებელმა, ბრაიან ექტონმა წამოიწყო და პირადი ინფორმაციის დაცვის მიზნით, ადამიანებს საკუთარი გვერდების გაუქმებისკენ მოუწოდა. მან ილონ მასკსაც მიმართა, რომელმაც განაცხადა, რომ წარმოდგენა არ ჰქონდა, თუ მის კომპანიებს ფეისბუქზე ოფიციალური გვერდები ჰქონდა.

ამის შემდეგ, ილონ მასკმა ორივე კომპანიის გვერდი მალევე გააუქმა. ამ წუთისთვის, ფეისბუქზე არც SpaceX-ისა და არც Tesla-ს გვერდები აღარ იძებნება. ყველა, ვინც ამ კომპანიების გვერდის მოძებნას შეეცდება, შეტყობინებას მიიღებს, რომ ეს გვერდი დროებით არ არის ხელმისაწვდომი.

ფოტო: Techcrunch

მოგვიანებით, ილონ მასკმა ტვიტერზე ინსტაგრამის პოსტი გამოაქვეყნა, რომელზეც მომხმარებელმა უპასუხა, რომ ფრთხილად უნდა იყოს, რადგან ინსტაგრამი ფეისბუქის საკუთრებაა. კომენტარს მასკმა შემდეგნაირად უპასუხა: დიახ, ეს მეტისმეტია. ფეისბუქის გავლენა ნელნელა გვეპარება.

ფეისბუქი სკანდალში მისი მომხმრებლების ინფორმაციის გაჟონვის გამო გაეხვა. 2014 წელს ფეისბუქზე გამოჩნდა ქვიზი, სახელად this is your digital life, რომელიც ადამიანებს სთავაზობდა მათი პერსონალური ტიპის დადგენას. აპლიკაცია კემბრიჯის უნივერსიტეტის აკადემიკოსის, ალექსანდრ კოგანის მიერ იყო შექმნილი (უნივერსიტეტს კემბრიჯ ანალიტიკასთან არაფერი აკავშირებს). აპლიკაცია მონაცემებს არა მხოლოდ ქვიზში მონაწილე ადამიანების, არამედ მათი მეგობრების შესახებაც აგროვებდა. ამ გზით, კომპანიამ 50 მილიონზე მეტი მომხმარებლის ინფორმაციის მოპოვება შეძლო.

მოგვიანებით, ალექსანდრ კოგანმა შეგროვებული მონაცემები Cambridge Analytica-ს გაუზიარა. ამ უკანასკნელმა, მიღებული მონაცემების გამოყენებით შექმნა პროგრამა, რომელსაც არჩევნების შედეგებზე გავლენის მოხდენა შეეძლო და მას ტრამპის საარჩევნო კამპანიისთვის იყენებდა.

ამავე თემაზე: