სოციალური ქსელის გიგანტი, ფეისბუქი, დიდ სკანდალში გაეხვა და უდიდესი კრიზისის წინაშე დგას. კომპანია ხალხის ნდობას კარგავს, რაც მარკ ცუკერბერგის ყოფილი მენტორის აზრით, ფეისბუქის არსებობის დასასრულის დასაწყისი შეიძლება აღმოჩნდეს.

"მათ [ფეისბუქმა] ჯერჯერობით პირველი ნაბიჯიც არ გადადგეს, რომ შეცდომა ეღიარებინათ", - ამბობს როჯერ მაკნეიმი CNN-თან საუბარში.

"თუკი ისინი სწრაფად არ მიიღებენ გადაწყვეტილებას, ხალხი იფიქრებს, რომ ფეისბუქის ნდობა აღარ შეიძლება. ახლა სწორედ ამ საშიშროების წინაშე დგას კომპანია", - დაამატა მან კრისტიან ამანპურისთვის მიცემულ ინტერვიუში.

მაკნეიმი ამბობს, რომ 2016 წელს ის მარკ ცუკერბერგსა და მთავარ ოპერაციულ დირექტორს, შერილ სანდბერგს აფრთხილებდა, რომ ფეისბუქს სისტემური პრობლემები ჰქონდა.

"მათი პასუხი იყო, რომ ეს საკითხი საზოგადოებასთან ურთიერთობის პრობლემად აღმექვა და არა ბიზნესის პრობლემად", - ამბობს ცუკერბერგის ყოფილი მენტორი.

ფეისბუქი სკანდალში მისი მომხმარებლების ინფორმაციის გაჟონვის გამო გაეხვა. აკადემიკოსმა ალექსანდრ კოგანმა და მისმა კომპანიამ Global Science Research-მა, 2014 წელს შექმნა აპლიკაცია "thisisyourdigitallife". კომპანია მომხმარებლებს ფულს უხდიდა ფსიქოლოგიური ტესტის გავლის სანაცვლოდ, აპლიკაცია კი მონაცემებს აგროვებდა. გავრცელებული ინფორმაციის თანახმად, აპლიკაცია ფეისბუქის მომხმარებლების შესახებაც აგროვებდა მონაცემებს. ამ გზით, კომპანიამ 50 მილიონზე მეტი მომხმარებლის ინფორმაციის მოპოვება შეძლო.

მოგვიანებით, ალექსანდრ კოგანმა შეგროვებული მონაცემები Cambridge Analytica-ს გაუზიარა. ამ უკანასკნელმა, მიღებული მონაცემების გამოყენებით შექმნა პროგრამა, რომელსაც არჩევნების შედეგებზე გავლენის მოხდენა შეეძლო. ამის შესახებ ინფორმაციას კრისტოფერ უილი ავრცელებს.

უილი ამტკიცებს, რომ Cambridge Analytica-სთვის მიყიდული ინფორმაცია, ფირმამ ადამიანების ფსიქოტიპური პროფილების შესაქმნელად გამოიყენა და შემდეგ მათ პრო-ტრამპისტულ მასალებს სწორი ფორმით ონლაინ აწვდიდა.

Cambridge Analytica-ს სკანდალმა ფეისბუქის რეპუტაციასთან ერთად, ფინანსური პრობლემებიც გამოიწვია - კომპანიის საბაზრო ღირებულება ბოლო ერთი კვირის განმავლობაში $50 მილიარდით დაეცა.

ფეისბუქი აქამდეც გახვეულა სკანდალებში. საქმე ეხება 2016 წლის აშშ-ს პრეზიდენტის არჩევნებს, სადაც რუსეთის მიერ წარმოებული პროპაგანდისტული საქმიანობა იკვეთება. კრიტიკოსები ფეისბუქს საყვედურობდნენ, რომ მან ვერ აღკვეთა რუსეთის ხელისუფლების მხრიდან დიდი რაოდენობით დეზინფორმაციის გავრცელება.

მარკ ცუკერგბერგს ამ დრომდე რაიმე სახის კომენტარი არ გაუკეთებია. აშშ-სა და დიდი ბრიტანეთის მთავრობები მარკ ცუკერბერგისა და სხვა პასუხისმგებელი პირების დაკითხვას უახლოეს პერიოდში აპირებენ.