საერთაშორისო გამჭვირვალობა - საქართველო 2015 წელს, საქართველოს პარლამენტის საქმიანობის შესახებ ანგარიშში წერს, რომ სულ პლენარული სხდომების საპატიო მიზეზით გაცდენის 2 199 შემთხვევა დაფიქსირდა, რაც 2014 წელთან შედარებით 272-ით მეტია.

ანგარიშში აღნიშნულია ისიც, რომ არასაპატიო მიზეზით, ერთზე მეტი სხდომის გაცდენისთვის დეპუტატებისთვის ხელფასის 10% არ დაუკავებიათ. პარლამენტის რეგლამენტის თანახმად, დეპუტატს ხელფასი არ უკავდება რიგგარეშე სხდომის გაცდენის შემთხვევაში.

TI-ს მიხედვით, საქართველოს პარლამენტის 2015 წლის საგაზაფხულო და საშემოდგომო სესიების პერიოდში პარლამენტის წევრებმა სხვადასხვა საპატიო მიზეზით გააცდინეს 2 199 სხდომა. გაცდენების მიზეზები შემდეგია:

  • ავადმყოფობა – 118 გაცდენა (2014 წელთან შედარებით ეს მაჩვენებელი 64-ით შემცირდა);
  • ოჯახური მდგომარეობა – 1 442 გაცდენა (2014 წელთან შედარებით ეს მაჩვენებელი
    65-ით გაიზარდა);
  • სამსახურებრივ მივლინებაში ყოფნა – 337 გაცდენა (2014 წელთან შედარებით ეს
    მაჩვენებელი 31-ით შემცირდა);
  • პოლიტიკური მოსაზრება – 302 გაცდენა.

ოჯახური მდგომარეობა გაცდენის საპატიო მიზეზად მიიჩნევა, რადგან პარლამენტმა ვერ შეძლო შესაბამისი ცვლილებების შეეტანა პარლამენტის რეგლამენტში. კანონპროექტი პირველი მოსმენით მიიღეს პლენარულ სხდომაზე, მეორე საკომიტეტო მოსმენაზე მოიწონა წამყვანმა კომიტეტმა, თუმცა მეორე მოსმენით პლენარულ სხდომაზე მისი განხილვა აღარ მომხდარა.

საერთაშორისო გამჭვირვალობა - საქართველო იმ დეპუტატების სიას აქვეყნებს, რომლებსაც პლენარული სხდომების არასაპატიო მიზეზით ყველაზე მეტი გაცდენა ჰქონდათ:

  • ზურაბ ჯაფარიძე - 10;
  • ნიკოლოზ ყიფშიძე - 10;
  • კობა დავითაშვილი - 9;

ხოლო, საკომიტეტო სხდომების არასაპატიო მიზეზით ყველაზე მეტი გაცდენა აქვთ:

  • ნუგზარ წიკლაური - 73;
  • მარიამ საჯაია - 69;
  • პაატა ლეჟავა - 62;
  • გიორგი ღვინიაშვილი - 62;

საერთაშორისო გამჭვირვალობა – საქართველომ აღნიშნული მონაცემები პარლამენტის საორგანიზაციო დეპარტამენტიდან გამოითხოვა.