თურქეთის პრეზიდენტმა, რეჯებ ტაიპ ერდოღანმა სირიელ დევნილებს თურქეთის მოქალაქეობის მიღება შესთავაზა. ამის შესახებ პრეზიდენტმა კილისის პროვინციაში, სირიის საზღვართან ახლოს, რამადანის მარხვის დასრულებისადმი მიძღვნილ სადილზე განაცხადა. ინფორმაციას Aljazeera ავრცელებს.

„ჩვენ ვაპირებთ დავეხმაროთ სირიელ მეგობრებს, სურვილის შემთხვევაში, მიიღონ თურქეთის მოქალაქეობა“

თურქეთის პრეზიდენტმა განაცხადა, რომ შინაგან საქმეთა სამინისტრო მალე გაავრცელებს ინფორმაციას მოქალაქეობის მისაღებად საჭირო პროცედურების შესახებ. ერდოღანს არ დაუკონკრეტებია, შეძლებს თუ არა თურქეთი 2,7 მილიონი დევნილის სრულად მიღებას, ან რა კრიტერიუმებით შეარჩევენ მათ, ვინც მოქალაქეობას მიიღებს და რა დრო დასჭირდება ამ პროცედურას.

„ჩვენ აღგიქვამთ როგორც დებს და ძმებს, თქვენ არ ხართ სამშობლოდან შორს, თქვენ ხართ თქვენი სახლებისა და მიწებისგან, თურქეთიც თქვენი სამშობლოა“ - ასე მიმართა კილისის პროვინციაში მცხოვრებ დევნილებს ერდოღანმა.

კილისის პროვინციაში 120 000 დევნილია, ეს რიცხვი ადგილობრივი მოსახლეობის რაოდენობას ჭარბობს.

2011 წელს ანკარამ უარი განაცხადა სირიელებისთვის დევნილის სტატუსის მინიჭებაზე და ისინი სტუმრის სტატუსით მიიღო. მხოლოდ მცირე რიცხვს მისცეს მუშაობისა და ცხოვრების უფლება.

ალ ჯაზირასთან ინტერვიუში თურქი პოლიტოლოგი მუსტაფა აკიოლი აცხადებს, რომ მთავრობის გეგმა მარტივი შესასრულებელი არ არის. მისი განცხადებით, თურქეთში ქართველი, სომეხი და სხვა ეროვნების წარმომადგენლებიც ცხოვრობენ ეკონომიკური ან სხვა ფაქტორებიდან გამომდინარე, უცნობია რამდენად შეეხება მათ მოქალაქეობის მიღების პროცესი, თუმცა სირიელი დევნილებისთვის ეს პროცესი გამარტივებული იქნება.

აიკოლი მიიჩნევს, რომ თურქეთის ოპოზიციის ლიდერები ერდოღანის ამ ნაბიჯს პოლიტიკური ხმების მიღების მცდელობას აფასებენ. მათი მოსაზრებით, ერდოღანი ამომრჩევლების „იმპორტს“ მოახდენს, რომლებიც მადლიერების გამო პრეზიდენტის მუდმივი ამომრჩევლები გახდებიან.

გარდა ამისა, აიკოლი მიიჩნევს, რომ მსგავსი რაოდენობის უცხოეროვანი ხალხის თურქ საზოგადოებაში ინტეგრირება ბევრ პრობლემას შექმნის, მათ შორის ეკონომიკურსაც.