თბილისის ზოოპარკში ორი სპილო ბინადრობს, მდედრი მალკა და მამრი გრანდი. მიუხედავად იმ თავდაუზოგავი ზრუნვისა, რასაც მათ მიმართ ზოოპარკის თანამშრომლები იჩენენ, მალკას სტერეოტიპული ქცევა ჩამოუყალიბდა.

სტერეოტიპული ქცევა დაავადება არ არის, თუმცა, ველურ ბუნებაში ყოფნისას, სპილოებს ის არ უყალიბდებათ, რადგან მათ ყოველდღიურად უწევთ თავის გადასარჩენად ბრძოლა და ყურადღება ამ პროცესზე აქვთ გადატანილი.

"სტერეოტიპული ქცევა ეს არის განმეორებადი ქცევა, რომელსაც ძირითადად გარემო პირობები იწვევენ. სპილო ძალიან ინტელექტუალი ცხოველია, შესაბამისად, ის გარემო სადაც იმყოფება არ ჰყოფნის. არ ჰყოფნის მის ტვინს. და იწყება ეს განმეორებადი ქცევები. მალკას უკვე რამდენიმე წელია ეს ქცევა ჩამოუყალიბდა" - გვითხრა ზოოპარკის დირექტორის ასისტენტმა ხატია ბასილაშვილმა.

ამ ქცევის გამო, ზოოპარკის თანამშრომლები მალკას ცხოვრებას და გარემოს უფრო მრავალფეროვანს ხდიან:

"საკვებს ვაწვდით იმგვარად რომ მისი მოპოვება დასჭირდეს. ახალი საკვებურები გავუკეთეთ, საიდანაც საკმაოდ რთულია თივის ამოღება და მთელი დღე იმაზე ფიქრი უწევს, როგორ მოიპოვოს საკვები. თუმცა რადგან ეს ქცევა უკვე ჩვევაში აქვს, როგორც კი საქმეს მორჩება თავის ქნევას იწყებს".

მალკა ახლა 21 წლისაა. ხატია ბასილაშვილის თქმით, გრანდის, მალკას მამრ პარტნიორს, ეს ქცევა არ ახასიათებს

"ხასიათზეცაა ეგ დამოკიდებული. გრანდი უფრო ლაღია რაღაცნაირად და უფრო ონავარი. მალკა პირიქით - ძალიან ჭკვიანი და მოსიყვარულეა ნაცნობი ადამიანების მიმართ და აქვს ეს ქცევა რაღაც პერიოდულობით".

სტერეოტიპული ქცევა რიტმულ მოძრაობას გულისხმობს, ცირკში ამ ქცევას წამყვანები ცეკვად "ასაღებენ". მისი "შესრულების" დროს, სპილო ფეხებს არ ამოძრავებს და მხოლოდ ტანით მოძრაობს.