კლუბ ბასიანის დაცვის სამსახურის უფროსის დაჭრაში ბრალდებულის ადვოკატი, ზაზა მესხი ამბობს, რომ მისი დაცვის ქვეშ მყოფს დაცვის თანამშრომლები ფიზიკურ და სიტყვიერ შეურაცხყოფას აყენებდნენ. ამის შესახებ ადვოკატმა სააპელაციო სასამართლოს სხდომის დაწყებამდე განაცხადა.

"ვერ გეტყვით რა გადაწყვეტილება იქნება მიღებული. ყოველივე ეს არის ყველა მხრიდან აშკარა ზეწოლა სასამართლოზე, როგორც პროკურატურის ისე, არასამთავრობო ორგანიზაციების მხრიდან, ყველა მხრიდან [მმართველი გუნდიდანაც]", - თქვა ადვოკატმა და დასძინა, რომ კლუბის მფლობელებს ჰყავს მფარველები.

თბილისის სააპელაციო სასამართლო რამდენიმე წუთში კლუბ ბასიანთან 13 იანვარს გამთენიისას დაცვის ორი წევრისა და პოლიციის თანამშრომლის დაჭრის საქმეზე ბრალდებული თამაზ ქვლივიძის აღკვეთის ღონისძიების საკითხს განიხილავს. თბილისის საქალაქო სასამართლომ ბრალდებულს აღკვეთის სახედ გირაო შეუფარდა.

ბასიანის წარმომადგენლის, ნაჯა ორაშვილის ინფორმაციით, მას შემდეგ, რაც 13 იანვარს თავდამსხმელი კლუბში არ შეუშვეს, მან კლუბის დაცვის უფროსს და დაცვის წევრებს რამდენიმე ჭრილობა მიაყენა. მისივე თქმით, ბრალდებულმა ჭრილობები მიაყენა დიდუბე-ჩუღურეთის სამმართველოს განყოფილების უფროსის მოადგილესაც.

15 იანვარს, კლუბ ბასიანის დაცვის წევრების დაჭრაში ბრალდებული თ.ქ. თბილისის საქალაქო სასამართლომ 30 ათას ლარიანი გირაოს სანაცვლოდ გაათავისუფლა. პროკურატურა პირისთვის აღკვეთის ღონისძიებად პატიმრობას ითხოვდა და საჩივრით სააპელაციო სასამართლოს მიმართა.