Lady Bird-ის რეჟისორი, გრეტა გერვიგი ამბობს, რომ ვუდი ალენთან აღარასდროს ითანამშრომლებს.

გრეტა ალენის ფილმში, To Rome With Love, ერთ-ერთ როლს ასრულებდა.

New York Times-თან საუბრისას, გრეტა ამბობს რომ ვუდი ალენის შესახებ გაგებული ამბები მისთვის გულისმომკვლელი აღმოჩნდა.

"სანამ ვუდი ალენთან დავიწყებდი მუშობას, მის შესახებ ძალიან ბევრი ისტორია გამოვიკითხე, რადგან გავრცელებულ ცნობებს გულგრილად არ ვეკიდებოდი. ახლა, როდესაც დილან ფერუმ საჯაროდ ისაუბრა ალენის საშინელ ქცევებზე, ეს ჩემთვის გულისმომკვლელი აღმოჩნდა. ჩემთვის ყველაფერი ნათელი გახდა. დილანმა საშუალება მომცა ყველაფერი თავიდან გამეანალიზებინა. მიუხედავად იმისა, რომ მე ვუდი ალენის ფილმებზე გავიზარდე, ახლა უკვე შემიძლია გავაკეთო განსხვავებები. თუ კარგ ფილმებს იღებ, ეს შენს ჩადენილ დანაშაულებს ვერ დაფარავს", - ამბობს გრეტა.

შეგახსენებთ, რომ ვუდი ალენი ძალადობაში დილან ფეროუმ რამდენიმე დღის წინ კიდევ ერთხელ დაადანაშულა.

დილან ფეროუ მია ფეროუმ და ვუდი ალენმა ერთად ცხოვრების დროს იშვილეს. დილანის თქმით, 1992 წელს ის 7 წლის იყო, როდესაც ვუდი ალენმა მასზე პირველად იძალადა.

ამ ბრალდებას სასამართლო მოჰყვა, რომელმაც 1993 წელს ვუდი ალენს ფეროუსთან ურთიერთობისას აყვანილ ორ და ერთ ბიოლოგიურ შვილზე მეურვეობა არ მისცა.

ფეროუსა და ალენს 13-წლიანი ურთიერთობისას ბიოლოგიური შვილი რონან ფეროუ შეეძინათ, რომელიც ახლა გამომძიებელი ჟურნალისტია. მან ჰარვი ვაინშტაინის წინააღმდეგ არსებული ბრალდებების გამოაშკარავებას ხელი შეუწყო.

1997 წელს ვუდი ალენმა მია ფეროუს მიერ წარსულში ნაშვილები სუნ-ი პრევინი შეირთო ცოლად. მასთან ურთიერთობა ალენმა ჯერ კიდევ ფეროუსთან თანაცხოვრებისას დაიწყო.

1993 წლის სასამართლოდან 2014 წლამდე ვუდი ალენი საჯაროდ აღარ დაუდანაშაულებიათ დილან ფეროუზე სექსუალურად ძალადობაში, თუმცა მას შემდეგ, რაც მას 2014 წელს ოქროს გლობუსი გადასცეს, რონანმა და მიამ ოქროს გლობუსი გააკრიტიკეს, დილანმა კი ნიუ-იორკ ტაიმსში ღია წერილი გამოაქვეყნა, სადაც ალენის მხრიდან ძალადობაზე საუბრობდა.

ვუდი ალენმა დილანს ასევე ნიუ-იორკ ტაიმსში გამოქვეყნებული წერილით უპასუხა, ბრალდება უარყო და განაცხადა, რომ დილანს სექსუალური ძალადობა მია ფეროუმ შთააგონა, რადგან მისი და პრევინის ურთიერთობის წინააღმდეგი იყო.

წელს, ოქროს გლობუსის დაწყებამდე ცოტა ხნით ადრე, დილან ფეროუმ რამდენიმე ტვიტი გამოაქვეყნა, სადაც აღნიშნა, რომ მხარს უჭერდა ძალადობის წინააღმდეგ დაწყებულ კამპანიებს, #MeToo-სა და #Time'sUp-ს. თუმცა დასძინა, რომ ეს კამპანიები ყველა მოძალადეს უნდა ეხებოდეს, მათ შორის ვუდი ალენს.

ვუდი ალენთან დაკავშირებით საკუთარი პოზიცია გამოხატა გრეის ანატომიის ვარსკვლავმა ელენ პომპეომაც.

მსახიობი ამავდროულად მის კოლეგებს მოუწოდებს, რომ რეჟისორის ფილმებში აღარ ითამაშონ.