Grey's Anatomy-ის ვარსკვლავი ელენ პომპეო საკუთარ ტვიტერზე რეჟისორ ვუდი ალენს აკრიტიკებს და მის ფილმებს სნობურ ნაგავს უწოდებს, თავად ვუდის კი სულელს.

მსახიობი ამავდროულად მის კოლეგებს მოუწოდებს, რომ რეჟისორის ფილმებში აღარ ითამაშონ.

ეს პირველი შემთხვევა არ არის, როცა ელენი ვუდი ალენის მისამართით მსგავს განცხადებებს აკეთებს. ელენმა ერთ-ერთ ინტერვიუში გაკვირვებაც კი გამოთქვა, რომ ჰარვი ვაინშტაინის მსგავსად ჰოლივუდში ალენის საქციელზე ხმამაღლა არავინ საუბრობს.

გრეის ანატომიის ვარსკვლავის განცხადებებს დილან ფეროუც გამოეხმაურა, რომელმაც თავის დროზე ალენი გაუპატიურებაში დაადანაშულა.

დილანი იმედოვნებს, რომ Time's Up კამპანია ვუდი ალენსაც შეეხება.

დილან ფეროუ მია ფეროუმ და ვუდი ალენმა ერთად ცხოვრების დროს იშვილეს. დილანის თქმით, 1992 წელს ის 7 წლის იყო, როდესაც ვუდი ალენმა მასზე პირველად იძალადა.

ამ ბრალდებას სასამართლო მოჰყვა, რომელმაც 1993 წელს ვუდი ალენს ფეროუსთან ურთიერთობისას აყვანილ ორ და ერთ ბიოლოგიურ შვილზე მეურვეობა არ მისცა.

1993 წლის სასამართლოდან 2014 წლამდე ვუდი ალენი საჯაროდ აღარ დაუდანაშაულებიათ დილან ფეროუზე სექსუალურად ძალადობაში, თუმცა მას შემდეგ, რაც მას 2014 წელს ოქროს გლობუსი გადასცეს, რონანმა და მიამ ოქროს გლობუსი გააკრიტიკეს, დილანმა კი ნიუ-იორკ ტაიმსში ღია წერილი გამოაქვეყნა, სადაც ალენის მხრიდან ძალადობაზე საუბრობდა.

ვუდი ალენმა დილანს ასევე ნიუ-იორკ ტაიმსში გამოქვეყნებული წერილით უპასუხა, ბრალდება უარყო და განაცხადა, რომ დილანს სექსუალური ძალადობა მია ფაროუმ შთააგონა, რადგან მისი და პრევინის ურთიერთობის წინააღმდეგი იყო.