პატივცემულო ბატონო მინისტრო,

დიდი მადლობა გუშინდელი ხანგრძლივი შეხვედრისათვის და დროისათვის, რომელიც დაგვითმეთ. სამწუხაროდ გუშინდელი შეხვედრა იმედგამაცრუებელი გამოდგა და ვერანირ კონკრეტულ შედეგამდე ვერ მიგვიყვანა.

ჩვენ არ მოგვეცა ყველაზე მიშვნელოვანი საკითხის, პავილიონის განხილვის შესაძლებლობა. შეხვედრის დახურვის ფორმა და გზავნილი, ჩვენი შეხედულებით, არ იყო კონსტრუქციული. შეხვედრის შემდეგ ძალიან ბევრი პრობლემა დარჩა გადაუჭრელი და შეკითხვა პასუხგაუცემელი, რომლებიც, იძულებულები ვართ, ახლა ნაწილობრივ მაინც წერილობით ჩამოვაყალიბოთ.

1. პავილიონის სამხატვრო ხელმძღვანელმა გუშინდელ შეხვედრაზე თქვა, რომ მან უკვე თვეზე მეტია რაც დატოვა პროექტი. ლოგიკური იქნებოდა გვევარაუდა, რომ ამ ხნის განმავლობაში მას პროექტზე არ უმუშავია. შესაბამისად, თუკი ის პრეზენტაცია, რომელიც ჩვენ გუშინ ვნახეთ, თვეზე მეტია არსებობს, გვიჩნდება ბუნებრივი კითხვა, რატომ არ ჰქონდა ეს მასალა წიგნის ცენტრს.
2. ამ მარტივი შეკითხვიდან და გუშინდელი შეხვედრიდან ჩანს, რომ კომუნიკაცია ფრანკფურტის წიგნის ბაზრობისათვის ორ უმნიშვნელოვანეს კომპონენტს, წიგნის ცენტრსა და პავილიონის სამხატვრო ხელმძღვანელს შორის უკიდურესოად ხარვეზიანი და პირადი ემოციებით დატვირთული იყო. ამ კომუნიკაციის გარეშე პროექტის წარმატებაზე ლაპარაკი სრულიად ზედმეტია. სამწუხაროდ, როგორც გამოჩნდა, ვერც გუშინდლამდე და არც გუშინ ამ პრობლემის აღმოფხვრა სამინისტრომ ვერ მოახერხა.
3. გუშინდელი შეხვედრის შემდეგ გაურკვეველი დარჩა საკითხი ვინ და რა ფორმით უხელმძღვანელებს პავილიონს.
4. არფერი თქმულა იმის შესახებ, ეთანხმებით თუ არა ჩვენს წერილს, რომელშიც მრჩეველთა საბჭოს ფუნციებსა და შემადგენლობაზე იყო ლაპარაკი.
5. არადამაკმაყოფილებელია და ჩვენი საერთო ჯამში თითქმის 18 საათიანი საერთო მუშაობის ერთადერთი ხელშესახები შედეგია მთელი პროექტის თქვენს უშუალო დაქვემდებარებაში გადმოსვლა, რასაც მივესალმებით.

ახლა რამდენიმე შინაარსობრივი შეკითხვა, რომლის დასმის საშუალებაც გუშინ, სამწუხაროდ, არ მოგვცემია.

1. პავილიონის პროექტი დაუმთავრებელია. როგორც არქტიქტურულ კომპანია, ისე სამხატრვო ხელმძღვანელი ჯერ კიდევ (თავიანთივე თქმით) ბოლომდე არ არიან ჩამოყალიბებული იმაზე, თუ როგორ უნდა გამოიყურებოდეს პავილიონი. შესაბამისად, იმისათვის რომ პროექტმა საბოლოო სახე მიიღოს, ჯერ კიდევ დიდი სამუშაოა წინ.
2. იქიდან გამომდინარე, რომ პროექტს ქვია „ფრანკფურტის წიგნის ბაზრობა“ და არა ქართული კულტურის დეკადა გერმანიაში, ბუნებრივია, რომ თანმხლები კულტურული პროგრამაც და პავილიონიც ა) აწყობილი იყოს ლიტერატურულ პროგრამაზე; ბ) ითვალისწინებდეს კონცეფციას (ანბანით მოთხრობილი საქართველო) და გ) PR-კონცეფციის ცენტრალურ მესიჯებს.

ეს სამი კომპონენტი, გუშინდელი პრეზენტაციიდან გამომდინარე პავილიონში ჯეროვნად ასახული არაა.

• ძალიან ზოგადმა და კონკრეტიკისაგან მაქსიმალურად დაცლილმა 2 ძირითადი PR-გზავნილმა „საქართველოს მრავალფეროვნება“ და „საქართველო ევროპული ქვეყანაა“, ლიტერატურულ და კულტურულ პროგრამებში, ისევე როგორც პავილიონში კონკრეტული ფორმები უნდა მიიღოს. ეს ფორმები გუშინდელ პრეზენტაციაში არ გამოჩნდა.
• პროექტის ზოგადი კონცეფცია „ანბანით მოთხრობილი საქართველო“ პავილიონის სამხატრვო ხელმღვანელის ინტერპრეტაციაში ხდება „საქართველო = საქართველოს ისტორიას“. ისტორია კი ფაქტიურად ქრონოლოგიურადაა მოყოლილი.

კონკრეტულ სივრცეებს რომ თავი დავანებოთ (რაზეც ასევე ბევრია სალაპარაკო), როგორც მინიმუმ ეს კონცეპტუალური მიდგომა და მისი შესაბამისობა ზოგად კონცეფციასთან და PR-სტრატეგიასთან განსახილველია. როგორც ჩანს, ეს სამინისტროში დღემდე არ მომხდარა, რომ არაფერი ვთქვათ ცენტრსა და სამხატვრო ხელმძღვანელს შორის არშემდგარ კომუნიკაციაზე.

იმედს ვიტოვებთ, რომ ჩვენი მომავალი შეხვედრები აღარ გაიმართება ბრიფინგის რეჟიმში და მიმართული იქნება კონკრეტული პრობლემების გადაჭრისაკენ.

პატივისცემით,

ლაშა ბუღაძე, რატი ამაღლობელი, თეონა დოლენჯაშვილი, ნესტან-ნენე კვინიკაძე, ტორესა მოსი, ნინია მაჭარაშვილი, გვანცა ჯობავა, მარიამ კასრაძე, თინათინ მამულაშვილი, ნატო ალხაზიშვილი, გიორგი ლობჟანიძე, ზაალ ანდრონიკაშვილი, გიორგი კეკელიძე