ლიტვამ მიიღო გადაწყვეტილება, უკრაინას მიჰყიდოს 2 მილიონი ევროს ღირებულების საბრძოლო მასალა. ამის შესახებ ლიტვის თავდაცვის საქმეთა სამინისტრო აცხადებს.

როგორც განცხადებაშია ნათქვამი, საუბარია იმ საბრძოლო მასალებზე, რომლებსაც ქვეყანა ნატოს სტანდარტის შეიარაღებაზე გადასვლამდე იყენებდა.

ლიტვის თავდაცვის მინისტრის თქმით, უკრაინისთვის იარაღის გადაცემა წარმოადგენს უკრაინის სუვერენიტეტისა და თავდაცვისუნარიანობის მტკიცე, ყოველმხრივი მხარდაჭერის ნაწილს.

ეს არ არის პირველი შემთხვევა, როცა ლიტვა უკრაინას სამხედრო სახის დახმარებას უწევს, რის გამოც მან რუსეთისგან საპროტესტო ნოტაც კი მიიღო. უკრაინული მედიის ცნობით, ლიტვის დახმარება უკრაინის მიმართ მხოლოდ სამხედრო ხასიათის არაა. ლიტველებმა უკრაინელებს ასევე გადასცეს სამი ციფრული ტელეგადამცემი, რათა უკრაინული ტელეარხები შეუფერხებლად გავრცელდეს სეპარატისტულ დონბასში.