ევროპარლამენტის პლენარულ სესიაზე, საქართველოს, უკრაინისა და მოლდოვის მხარდამჭერი რესოლუცია 519 ხმით მიიღეს. დღეს, 15 ნოემბერს, გამართულ კენჭისყრაში საკითხს მხარი 114-მა დეპუტატმა არ დაუჭირა.

ამ დოკუმენტით, ევროპარლამენტი რეკომენდაციებით მიმართავს ევროკავშირის საბჭოს, ევროკომისიასა და ევროპულ საგარეო ქმედებათა სამსახურს.

ევროპარლამენტი მოუწოდებს საბჭოს, შეიქმნას სპეციალური ნდობის ფონდი (trust fund) უკრაინისთვის, საქართველოსთვის და მოლდოვისთვის - მრავალდონორიანი ინსტრუმენტების გამოყენებით, საინვესტიციო პროექტების განსახორციელებლად.

დოკუმენტი მოუწოდებს კომისიას, ევროპის საინვესტიციო ბანკს და სხვა ფინანსურ ინსტიტუტებს, რომ მონაწილეობა მიიღონ ევროპული საინვესტიციო გეგმის წარმატებით განხორციელებაში.

ევროპარლამენტის ანგარიშში ასევე საუბარია "აღმოსავლეთ პარტნიორობის" ქვეყნების მოქალაქეებისთვის ევროკავშირის სასწავლო დაწესებულებებში სწავლის შესაძლებლობების გამარტივების აუცილებლობაზე.

ანგარიში ასახავს საქართველოსთვის პრიორიტეტულ რამდენიმე მიმართულებას, კერძოდ:

  • ევროპარლამენტი მიმართავს ევროკავშირის ინსტიტუტებს, რათა აღმოსავლეთ პარტნიორობის სამიტმა ხაზი გაუსვას, რომ ასოცირების შეთანხმებები საქართველოსთან მოლდოვასთან და უკრაინასთან არაა ევროკავშირთან ურთიერთობების საბოლოო მიზანი;
  • ევროპარლამენტი მოუწოდებს ევროკავშირის ინსტიტუტებს, რომ სამიტმა კიდევ ერთხელ აღიაროს საქართველოს, უკრაინისა და მოლდოვის ევროპული მისწრაფებები. გამომდინარე იქედან, რომ ევროკავშირის ხელშეკრულების 49-ე მუხლისა და 2017 წლის 25 მარტის რომის დეკლარაციის შესაბამისად, ყველა ევროპულ ქვეყანას აქვს უფლება განაცხადი გააკეთოს ევროკავშირის წევრობაზე.

ევროპარლამენტის ანგარიში მოიცავს მკაფიო გზავნილებს აღმოსავლეთ პარტნიორობის ქვეყნების სუვერენიტეტსა და ტერიტორიულ მთლიანობასთან დაკავშირებით. ამ კონტექსტში, ასევე ხაზგასმულია რუსეთის ფედერაციის მიერ საერთაშორისო ვალდებულებების შეუსრულებლობის საკითხი.

აღმოსავლეთ პარტნიორობის სამიტი 24 ნოემბერს ბრიუსელში გაიმართება.