ევროპარლამენტის ოფიციალურ ვებგვერდზე გავრცელებული ცნობით,7-8 ოქტომბერს საქართველოსთან დაკავშირებით მნიშვნელოვანი განხილვები და კენჭისყრა ჩატარდება.

განრიგის მიხედვით, 7 ოქტომბერს, ადგილობრივი დროით საღამოს 7 საათზე, ევროპარლამენტარები დებატებს გამართავენ. სესიის მთავარი თემა იქნება — "მმართველი პარტიის, ქართული ოცნების მცდელობები საქართველოში ოპოზიციური პარტიების აკრძალვის შესახებ".

ამავე საკითხზე მსჯელობის შემდგომ, ევროპული საკანონმდებლო ორგანოს წარმომადგენლები რეზოლუციის პროექტს კენჭს მომდევნო დღეს, 8 ოქტომბერს უყრიან.

"ტვ პირველის" ცნობით, რეზოლუციის პროექტი ევროპის სახალხო პარტიამ (EPP) მოამზადა. დოკუმენტი კატეგორიულად გმობს საქართველოში ოპოზიციური პოლიტიკური ძალების აკრძალვის მცდელობებს და საკონსტიტუციო სასამართლოში შეტანილი სარჩელის დაუყოვნებლივ გამოხმობას ითხოვს. ამასთანავე, ტექსტში ხაზგასმულია ევროკავშირისადმი მოწოდება, რომ დაწესდეს მიზნობრივი სანქციები მმართველი გუნდის ლიდერების — ბიძინა ივანიშვილის, ირაკლი კობახიძის, შალვა პაპუაშვილისა და კახა კალაძის წინააღმდეგ.

"მკაცრად გმობს საქართველოს ოპოზიციური პარტიების აკრძალვის მცდელობას და ითხოვს კონსტიტუციური სარჩელის დაუყოვნებლივ გაწვევას. ხაზს უსვამს, რომ ქმედითი პოლიტიკური ოპოზიცია დემოკრატიის შეუვალ ბურჯს წარმოადგენს და სასამართლო გზით ლეგიტიმური პოლიტიკური ოპოზიციის განადგურება შეუთავსებელია დემოკრატიასთან.

წუხილს გამოთქვამს ევროკავშირისა და წევრი სახელმწიფოების უმრავლესობის მხრიდან ქმედითი ნაბიჯების მუდმივ ნაკლებობაზე. კიდევ ერთხელ მოუწოდებს მიზნობრივი სანქციების დაწესებისკენ იმ პირთა წინააღმდეგ, რომლებიც პასუხისმგებელნი არიან დემოკრატიულ უკუსვლასა და პოლიტიკურ დევნაზე, უპირველეს ყოვლისა, ბიძინა ივანიშვილის, ირაკლი კობახიძის, შალვა პაპუაშვილისა და კახა კალაძის მიმართ", — წერია EPP-ის დოკუმენტში.

შეგახსენებთ, რომ ოპოზიციური პარტიების აკრძალვის მოთხოვნით პირველი სარჩელი 2025 წლის 31 ოქტომბერს იქნა შეტანილი. მაშინ საუბარი იყო 3 პარტიის აკრძალვაზე. ესენია: ერთიანობა — ნაციონალური მოძრაობა (ენმ), კოალიცია ცვლილებისთვის (გვარამია, მელია, გირჩი, დროა), ძლიერი საქართველო — ლელო (ხალხისთვის, თავისუფლებისთვის).

სარჩელს 88 დეპუტატი აწერდა ხელს (ქართული ოცნება + ხალხის ძალა + ევროპელი სოციალისტები).

მეორე (განახლებული) სარჩელი: 2026 წლის 20-21 აპრილს შეიტანეს. ქართულმა ოცნებამ ძველი სარჩელი უკან გამოითხოვა და ახალი შეიტანა, სადაც იმავე სამ პარტიას დაემატა მეოთხე — ფედერალისტები (თამარ ჩერგოლეიშვილი, გიგა ბოკერია). მიზეზად დაასახელეს 2026 წლის 2 მარტს შექმნილი ოპოზიციური ალიანსი, რომელშიც 9 პარტია გაერთიანდა და ფედერალისტებმაც გაიზიარეს "არაკონსტიტუციური მიზნები".

ორივე შემთხვევაში, მცირე პარტიები (დროა, გირჩი-მეტი თავისუფლება, სტრატეგია აღმაშენებელი, ევროპული საქართველო, რესპუბლიკური პარტია) სარჩელში მოხსენიებულია, მაგრამ მათი აკრძალვა ჯერჯერობით მოთხოვნილი არ არის "არსებითი გავლენის არქონის" გამო.

ქართულმა ოცნებამ საკონსტიტუციო სასამართლოს ყოფილი პრემიერმინისტრის, გიორგი გახარიას პარტიის, გახარია საქართველოსთვის აკრძალვასთან დაკავშირებითაც მიმდინარე წლის 21 სექტემბერს მიმართა.