"პრემიერმინისტრი კობახიძე აანონსებს ახალ კანონებს, რომლებიც ბრალდებებს ახლად ჩამოყალიბებულ პოლიტიკურ პარტიებზეც ავრცელებს," — ამის შესახებ საქართველოს მეხუთე პრეზიდენტი, სალომე ზუჯრაბიშვილი სოციალურ ქსელში ირაკლი კობახიძის განცხადებას ეხმაურება, სადაც სადაც მან განაცხადა, რომ ოპოზიციური პარტიების აკრძალვის სარჩელს დააკორექტირებენ.

"ტერორი საქართველოში: ყოველი დღე ახალ ნაბიჯს მოაქვს. პრემიერმინისტრი კობახიძე აანონსებს ახალ კანონებს, რომლებიც ბრალდებებს ახლად ჩამოყალიბებულ პოლიტიკურ პარტიებზეც ავრცელებს. მშვიდობიანი მომიტინგეების დაკავებები გრძელდება... არ არსებობს მშვიდობა სამართლიანობის გარეშე!",— დაწერა სალომე ზურაბიშვილმა.

შეგახსენებთ, ირაკლი კობახიძემ განაცხადა, რომ ოპოზიციური პარტიების აკრძალვის სარჩელს დააკორექტირებენ, რადგან ამ კოალიციაში შემავალი პარტია თავისუფლების მოედანიც ნაცმოძრაობის წიაღიდანაა, მისმა ლიდერმა, ლევან ცუცქირიძემ კი 2008 წლის არჩევნები გააყალბა.

მისივე თქმით, თითოეული მათგანი 2012 წლამდეც და 2012 წლის შემდეგაც, დაკავშირებული იყო და არის ან კონკრეტულად ნაცმოძრაობასთან, ან რადიკალურ ოპოზიციასთან.