ევროკავშირი მწუხარებას გამოთქვამს იმ ფაქტის გამო, რომ მიუხედავად საერთაშორისო თანამეგობრობის მუდმივი მოწოდებებისა, საქართველოს ოკუპირებულ ტერიტორიებზე სიტუაცია უფრო მეტად უარესდება.

ევროკავშირის აღნიშნულ განცხადებას შეუერთდნენ ალბანეთი, ანდორა, ბოსნია და ჰერცეგოვინა, საქართველო, ისლანდია, ლიხტენშტეინი, მოლდოვა, მონაკო, მაკედონია, მონტენეგრო, ნორვეგია, სან მარინო.

დღეს, 8 ნოემბერს, ევროპის საბჭოს მინისტრთა მოადგილეების კომიტეტის სხდომაზე საქართველოს ოკუპირებულ ტერიტორიებზე შექმნილი ვითარება, გენერალური მდივნის ანგარიში "კონფლიქტი საქართველოში" განიხილეს.

ანგარიშის განხილვისას განცხადებები გავრცელდა ევროკავშირის და სუამის სახელით.

ევროკავშირმა მოუწოდა რუსეთის ფედერაციას მოხსნას ნებისმიერი სახის დაბრკოლება, აკრძალვა ან შეზღუდვა ადმინისტრაციული სასაზღვრო ხაზების გასწვრივ გადაადგილების თავისუფლებაზე, შეწყვიტოს ადამიანების უკანონო დაკავება, მათ შორის ე.წ. საზღვრის უკანონო გადაკვეთის კონტექსტში.

ასევე მოუწოდებს აღკვეთოს ეთნიკური ნიშნით დისკრიმინაცია, ხელახლა გახსნას „გამშვები პუნქტები“ და გამოიძიოს ყველა უკანონო მოპყრობა, რაც არღვევს ადამიანის უფლებებს.

განცხადებაში დაგმობილია რუსეთის ფედერაციის, როგორც ეფექტიანი კონტროლის განმახორციელებელი ხელისუფლების მიერ აფხაზეთისა და ცხინვალის რეგიონებში განხორციელებული ქმედებები, რომლებიც არღვევს ადგილობრივი მოსახლეობის უფლებებს.

ანგარიშის განხილვისას ევროპის საბჭოს წევრი ქვეყნების მუდმივმა წარომადგენლებმა მოუწოდეს რუსეთის ფედერაციას უზრუნველყოს ევროპის საბჭოს შესაბამისი ორგანოების შესვლა აფხაზეთსა და ცხინვალის რეგიონებში, ასევე შეწყვიტოს ეთნიკური ნიშნით დისკრიმინაცია და უზრუნველყოს მშობლიურ ენაზე სწავლების შესაძლებლობა.

საგარეო საქმეთა მინისტრის პირველი მოადგილე დავით ზალკალიანი სიტყვით გამოვიდა კომიტეტის 1299-ე სხდომაზე.

დავით ზალკალიანმა გამოსვლაში ყურადღება გაამახვილა რუსეთის ფედერაციის მიერ საქართველოს რეგიონების ოკუპაციასა და ფაქტობრივი ანექსიისკენ გადადგმულ ნაბიჯებზე, საოკუპაციო ხაზის გასწვრივ გამშვები პუნქტების დახურვისა და ასევე უკანონო დაკავების ფაქტებზე, სოხუმსა და ახალგორში საბაჟო პუნქტების გახსნაზე, ეთნიკური ქართველებისათვის ე.წ. ბინადრობის მოწმობის იძულებით გაცემაზე და სხვა.

საგარეო საქმეთა მინისტრის პირველმა მოადგილემ ისაუბრა სოფელ ერედვში ქართველების კერძო საკუთრების განადგურების ფაქტებზე. მისი განცხადებით, აღნიშნული ფაქტები წარმოადგენენ იძულებით გადაადგილებულ პირთა უფლებების უხეშ დარღვევას და მიზნად ისახავენ ორივე რეგიონში ქართული კვალის ამოძირკვას.

დავით ზალკალიანმა ასევე ყურადღება გაამახვილა მშობლიურ ენაზე სწავლების შეზღუდვაზე. მისივე განცხადებით, აღნიშნული პროცესი, აფხაზეთის რეგიონის მსგავსად, ასევე დაიწყო ცხინვალის რეგიონშიც.